Foto: acat.kz
Magerram Magerramovtyń aıtýynsha, árbir tórtinshi tonaý, jol-kólik oqıǵasy jáne otbasylyq-turmystyq zorlyq-zombylyq quqyqbuzýshylyqtardyń jartysynan astamy mas kúıde jasalǵan.
Ol elimizde saýda nysandarynyń kámeletke tolmaǵandarǵa alkogoldik ishimdikterdi satpaıtynyna eshkim kepildik bermeıtinin, sebebi mundaı nysandardyń kóptiginen olardy fızıkalyq turǵydan tolyq baqylaý múmkin emes ekenine toqtaldy.
«Osyǵan baılanysty buryn qoldanysta bolǵan, balalar mekemeleri men bilim berý uıymdarynan 100 metr radıýsta alkogol ónimderin satýǵa tyıym salatyn normany qaıta engizý qajettiligi pisip-jetildi. Sonymen qatar alkogol ónimderin satatyn saýda núkteleriniń sanyn shekteý de mańyzdy. Qazaqstan halyq partııasy alkogol ónimderin mindetti tańbalaýdy usynady. Bul el aýmaǵynda alkogoldi zańsyz satý faktileriniń bar-joǵyn neǵurlym naqty qadaǵalaýǵa múmkindik berip, quqyqbuzýshylyqtardyń aldyn alýǵa yqpal etedi», dedi Magerram Magerramov.
Depýtat atalǵan máseleni sheshý úshin alkogol ónimderin mindetti sıfrlyq sáıkestendirý quraldarymen tańbalaýǵa jatatyn taýarlar tizbesine engizýdi, ony satý oryndaryn naqty aıqyndap, ózge jerlerde alkogol satýǵa jalpyǵa birdeı tyıym salýdy, bólshek saýdada 20:00-den keıin satýǵa, meıramhanalarda 22:00-den keıin satýǵa jáne onlaın satýǵa tyıym salýdy usyndy.
Aıta keteıik, búgingi Májilis otyrysynda depýtat Temir Qyryqbaev sábiz eksportyna tyıym salýǵa qatysty sharýalardy alańdatyp otyrǵan máselerdi kóterip, Premer-Mınıstrdiń orynbasary – Ulttyq ekonomıka mınıstri Serik Jumanǵarınge saýal joldady.
Al «AMANAT» partııasy fraksııasynyń múshesi Mútáli Ábútálip el aýmaǵynda jasyryn baqylaýǵa arnalǵan tehnıkalyq qurylǵylardyń baqylaýsyz aınalymy men jańa býyndaǵy avtomobılder arqyly jeke derekterdiń shetelge ketý qaýpine nazar aýdardy.
Sondaı-aq depýtat Edil Jańbyrshın óńirdegi kásipkerlermen kezdesý barysynda arnaıy reestrden sertıfıkat alý máselesi qozǵalǵanyn aıtty.
