Kollajdy jasaǵan – Qonysbaı ShEJIMBAI, «EQ»
Qor negizinen áleýmettik mańyzy bar, baǵdarlamalyq jobalardy júzege asyrady. Osy baǵyttaǵy aýqymdy bastamalarǵa qoldaý jasaıdy. Qıyn jaǵdaıǵa tap bolǵan, az qamtylǵan, kópbalaly, múgedektigi bar azamattarǵa naqty materıaldyq kómek kórsetedi. Barlyq qarjy eki baǵytqa – ataýly kómek pen damý baǵdarlamalaryna bólinip otyrady. Ataýly kómekke qaraǵanda, damý jobalarynyń basynda naqty adamdar emes, halyqtyń tutas toptary turady. Kómektiń eki túrin de alýshylar sanaty elimizdiń áleýmettik damýynyń basym baǵyttaryn negizge ala otyryp, Qor tujyrymdamasynda naqty belgilengen.
Qor densaýlyq saqtaý salasynda qymbat em-dom qajet etetin naýqastarǵa kómek kórsetedi, sırek kezdesetin aýrýlarǵa shaldyqqan balalardy emdeýge qarjy bóledi, shalǵaı aýyldarǵa medısınalyq qyzmetti qoljetimdi etýge atsalysady.
Bilim berý salasynda daryndy, biraq áleýmettik jaǵdaıy tómen oqýshylar men stýdentterge shákirtaqy taǵaıyndaıdy. Aýyl mektepterin qural-jabdyqtarmen tolyqtyryp, ınklıýzıvti bilim berý quraldarymen qamtamasyz etip otyrady. Aýyldyq jerlerde sport alańdaryn, rýhanııat nysandaryn salý, erekshe qajettiligi bar jandarǵa kedergisiz orta qalyptastyrý jumystarymen júıeli shuǵyldanady.
Qor qurylǵaly bergi úsh jyl ishinde birqatar naqty nátıjege qol jetkizdi. Aıtap aıtqanda, 2022 jyldan beri 2 500-den astam balaǵa sırek kezdesetin aýrýlardy emdeýge kómek kórsetildi. 10 myńnan astam stýdent pen oqýshy bilim granty men shákirtaqyǵa ıe boldy. El kóleminde 200-ge jýyq arnaıy jabdyqtalǵan bólme men psıhologııalyq-pedagogıkalyq kómek ortalyǵy ashyldy. 32 aýdandyq aýrýhana men ambýlatorııany zamanaýı quraldarmen jabdyqtaýǵa qarjy bólindi. Jalpy, Qor osy kezeńde 130 mlrd teńgeden astam qarajatty áleýmettik jobalarǵa baǵyttaǵan.
Qor tolyǵymen erikti qaıyrymdylyq esebinen jumys isteıdi. Qarjy iri kásipkerler men kompanııalardyń aýdarymdary, jeke tulǵalardyń ataýly jarnalary, memleketten tikeleı qarjylandyrý emes, qoǵamdyq qoldaý arqyly túsedi.
Qor jumysy ashyqtyq qaǵıdattaryna saı júrgiziledi. Arnaıy saıtta barlyq túsim men shyǵyndar týraly málimet turaqty jarııalanyp turady. Qarajat naqty jobalar men kómekke muqtaj adamdarǵa baǵyttalady. О́tinishter men usynystar onlaın rejimde qabyldanady.
Qor aldaǵy ýaqytta da halyqtyń áleýmettik álsiz toptaryna uzaqmerzimdi qoldaý kórsetý, medısınalyq saqtandyrý júıesin tolyqtyrýshy qural retinde qyzmet etý, aýyldyq jerler men aımaqtarda sapaly ómir súrýge múmkindik jasaý, balalar men jastardyń damýyna ınvestısııa salý jumystaryn júıeli, maqsatty túrde jalǵastyra beredi.
Túıindeı kelgende, «Qazaqstan halqyna» qory – memlekettik emes, halyqtyq sıpattaǵy iri áleýmettik joba. Qyzmeti áleýmettik ádilettilik, qaıyrymdylyq pen azamattyq jaýapkershilik qaǵıdattaryna negizdelgen. Memlekettiń qolyn uzartatyn, qoǵamnyń júregine jaqyn, ózara senimge qurylǵan biregeı qurylym.
