QMDB Tóraǵasy baıandamasynda musylmandardyń kúndelikti qarjylyq isterinde ósimqorlyqtan, ádiletsiz kelisimderden jáne kúmándi tabystan saqtanýǵa tyrysatynyn, sondaı-aq qoǵamda adal tabysqa degen suranystyń kúsheıgenin aıta kelip, Islam qarjysy qaǵıdalaryna negizdelgen ónimder men qyzmetterge degen qajettilik artqanyn tilge tıek etti.
«Qoǵamdaǵy bul suranys qarjy júıesiniń qurylymdyq ózgerýine túrtki bolyp jatyr. Dástúrli bank qyzmetterimen qosa ıslamdyq qarjylandyrý, seriktestikke negizdelgen kelisimder, lızıng, saqtandyrýdyń ıslamdyq túri sııaqty baǵyttarǵa suranys artyp keledi. Bul qarjy júıesiniń ádilettilik pen áleýmettik jaýapkershilikke negizdelýine jol ashady. Bul rette halyqtyń Islamǵa bet burýy sharıǵı qarjy salasynda pátýalardyń rólin arttyryp otyrǵanyn aıta ketken jón. Qarjyǵa qatysty dinı suraqtardyń kóbeıýin jáne qoǵamda osy salaǵa baılanysty suranystyń artýyn eskerip, QMDB Islam qarjysy sektoryn ashý týraly sheshim qabyldadym. Atalǵan sektor qarjylyq ónimderge sharıǵı saraptama jasap, qoǵamǵa senimdi ári birizdi pátýa usynatyn bolady», dedi Naýryzbaı qajy Taǵanuly.
Aıta keteıik, jańa sektor lızıng, saqtandyrý, ınvestısııa, oblıgasııa, sıfrlyq aktıvter men elektrondy tólem júıeleri sekildi jańa qarjylyq quraldarǵa sharıǵat turǵysynan baǵa beredi.
QMDB: jelidegi oqyrman sanyn bot arqyly kóbeıtýge tyıym salynady
Sonymen qatar jıynda 2026 jyl dinı sala aıasynda «Islam jáne adal qoǵam» jyly dep jarııalanyp, negizgi 4 baǵyttaǵy jumystarǵa, atap aıtqanda, ıhsan jáne nasıhat, dinı oqý-aǵartý, dástúr jáne otbasy, jat dinı aǵymdardan saqtandyrý is-sharalaryna basymdyq beriletini aıtyldy.
