Osy jolǵy «Aqqý kóli» tyń shyǵarmashylyq qadamdarǵa toly bolmaq. Basty aqqý partııalaryn oryndaıtyn balet ártisteri Torǵyn Leben (Odetta) men Kamıla Shahmanova (Odılııa) debıýttik óner kórsetedi.
«Odettanyń partııasyn Altynaı Asylmuratovanyń jetekshiligimen daıyndaý – men úshin zor mártebe ári jaýapkershilik. Daıyndyq jumystary tyıanaqty júrip jatyr. Kórkemdik jetekshimiz árbir qımyl men detalge nazar aýdaryp, tehnıkamen ǵana emes, beınemen ári qımyl formasymen de jumys isteıdi. Kez kelgen qımyl, kózqaras nemese dem ne úshin paıda bolatynyn túsindiredi. Rólimdi jaqsyraq túsinip, ony tereńnen sezinýge kómektesedi», deıdi Torǵyn Leben.
Sondaı-aq ol Odettanyń partııasynda qol plastıkasymen jumys isteý – kúndelikti eńbek ekenin aıtty.
«Árıne, qoldy aq ulpadaı názik qylý árdaıym sátti shyqpaıdy. Biraq qazir sonymen jumys istep jatyrmyn. Qımyldar birqalypty ári aýyspaly shyǵýy úshin ıyq, shyntaq pen bilektiń úılesimine nazar aýdaramyn. Sonymen qatar syzyqtar ádemi ári túzý qalpynda qalýy úshin klassıkalyq formany saqtaý mańyzdy», deıdi balerına.
Torǵyn Leben aq aqqýdyń beınesi ózine kóp jaǵdaıda jaqyn ekenin de atap ótti.
«Odettanyń túrli oryndaýlarynyń beınejazbalaryn qarap júrmin. Ony sol oryndaýshylardy qaıtalaý úshin emes, bir beıneniń qanshalyqty ártúrli ún qatatynyn túsiný úshin kóremin. О́z daralyǵymdy saqtap, osy partııany óne boıymnan ótkize otyryp, osy beınede óz yrǵaǵymdy tapqym keledi», dedi balet ártisi.
Al Kamıla Shahmanovaǵa qara aqqýdyń zulymdyǵy men jarqylyn kórsetý mindeti qoıyldy. Oryndaýshy úshin bul osy maýsymdaǵy B.Asafevtiń «Baqshasaraı burqaǵy» baletindegi Marııanyń rólindegi tabysty debıýtinen keıingi kezekti mańyzdy kezeń bolmaq.
«Odılııanyń beınesi óziniń mánerliligimen baýrap alady. Onyń minezin túsiný úshin P.Chaıkovskııdiń mýzykasyna tereńnen boılaý kerek. Sebebi óktemdik, aılakerlik pen saltanat – bári sonda kórsetilgen. Men onyń hanzadany ózine qaratyp alatyn eliktirerlik qýatyn kórsetýim kerek. Daıyndyq barysy qyzyp jatyr», dedi Kamıla Shahmanova.
Daryndy debıýtanttardan bólek, keıipkerlerdiń beınelerinde teatrdyń jetekshi solısteri sahnaǵa shyǵady. Atap aıtsaq, Odetta-Odılııanyń partııasyn Qazaqstannyń eńbek sińirgen qaıratkeri Aıgerim Beketaeva men Sofııa Ádilhanova tanystyrady, al bekzat hanzada Zıgfrıdtiń rólinde Qazaqstannyń eńbek sińirgen qaıratkeri Erkin Rahmatýllaev pen Dıas Qurmanǵazy óner kórsetedi. «Astana Opera» sımfonııalyq orkestrin qoıýshy dırıjer Arman Orazǵalıev basqarady. Aǵymdaǵy teatr maýsymy Aıgerim Beketaeva úshin shyǵarmashylyq qyzmetiniń 15 jyldyǵymen tuspa-tus kelgenin atap ótsek bolady. Jetekshi solıstiń ózi aıtqandaı, bir kezderi osy «Aqqý kólindegi» basty partııasy onyń tańdaǵan jolynyń durystyǵyna túbegeıli kózin jetkizgen.
Jyl basynda P.Chaıkovskııdiń kezekti jaýharyn kórsetý teatr úshin ıgi dástúrge aınaldy. Aıta ketetin bir jaıt, repertýarda usynylǵan sahnalyq redaksııanyń premerasy 2017 jyly Omanǵa gastrol kezinde ótken edi. Reseıdiń halyq ártisi Altynaı Asylmuratova týyndynyń tarıhı ulylyǵyn saqtaı otyryp, klassıkaǵa degen tereń kózqarasyn qosty. Eýropaǵa týrne kezinde Ispanııa men Italııadaǵy kórermen de osynaý baletti tańdanyspen qarsy alǵan edi.
