Basylymnyń habarlaýynsha, sulýlyǵy men arhıtektýrasy keremet úılesim tapqan shahardyń beldi dárejege ıe bolýy – sheteldik týrıster tarapynan qyzyǵýshylyqtyń artqanyn aıqyndaıdy.
Halyqaralyq Vogue jýrnaly Almatyny úzdik týrıstik baǵyttardyń qataryna engizýi beker emes. О́ıtkeni, basylym redaksııasy qalaǵa ózderi kelip, aralap, baǵa bergen. Nátıjesinde, kórkem tabıǵaty men erekshe arhıtektýrasyna tánti bolypty. Sondaı-aq olar megapolısti eski men zamanaýı úrdis toǵysqan shahar retinde sıpattap, gastronomııalyq mádenıettiń damyǵanyn jáne ulttyq qundylyqtarǵa da asa mán beriletinin atap kórsetken. Almatyny saıahatshylar eń kóp tańdaıtyn týrıstik ortalyqtardyń tizimine kirgizgen. Bul degenimiz – shaharǵa álemdik deńgeıde qyzyǵýshylyqtyń jyl sanap artyp kele jatqanyn dáleldeıdi.
Almaty qalasy byltyr 9 halyqaralyq týrıstik kórmege qatysyp, 270 kelisimge qol jetkizgen. Sondaı-aq Dýbaı, Shanhaı, Gonkong, Beıjiń, Rımını, Sıngapýr, London jáne Dohada «Almaty týrızm kúnderi» ótkizilgen.
Al «ALA CRAFT 2025» halyqaralyq qolóner festıvali 15 elden kelgen 100-ge jýyq sheberdiń basyn biriktirip, etnomádenı týrızm ortalyǵy retinde óziniń pozısııasyn nyǵaıtty. Bul óz kezeginde tek Almatynyń emes, búkil elimizdiń abyroıyn álemdik arenada arttyra tústi.
Almaty oblysynyń kolledjderi Qytaı, Eýropa jáne Azııa elderimen yntymaqtastyq ornatty
Aldaǵy ýaqytta Almaty tek jergilikti turǵyndardyń emes, týrısterdiń de túnin urlap, tamsana, tańdana qaraıtyn shaharǵa aınalmaq.
Bul rette el Prezıdenti Qasym-Jomart Toqaev megapolıs Parıj, Nıý-Iork, Máskeý sekildi kúndiz-túni qonaǵy úzilmeıtin, kóz ilmeıtin qala bolýy tıis dep tapsyrma bergen. Mamandar «bastama megapolıske aǵylatyn sheteldik saıahatshylar sanyn arttyryp, týrızm salasyna túsetin tabysty kóbeıtedi» deıdi.
Alaıda qazir de kórsetkish jaman emes. Byltyr Almatyǵa 1 mıllıon 800 myńnan asa týrıst kelipti. Bul 2024 jylmen salystyrǵanda 8,1 paıyzǵa kóp. Olardyń 563 myńy – sheteldik saıahatshylar bolsa, 1 mıllıon 300 myńnan astamy el ishin aralaǵan otandastarymyz. Osynyń arqasynda sońǵy 11 aıda salanyń negizgi kapıtalyna 171 mıllıard teńgeden asa ınvestısııa tartylǵan. Al aldaǵy ýaqytta Almatyny halyqaralyq deńgeıde tanymal etý úshin birqatar seriktestik jobalar qarastyrylypty.
«Halyqaralyq MISE-kórmelerge qatysý, jahandyq platformalarda onlaın-ilgeriletýdi damytý, avıakompanııalarmen jáne áýejaı ınfraqurylymymen birlesken marketıngtik naýqandar júrgizý josparlanýda. Atap aıtqanda, áleýmettik jelilerde jarııalanymdar, borttyq jýrnaldarda maqalalar, LED-ekrandarda kórsetiletin beınematerıaldar qarastyrylǵan. Bul qalanyń áleýetin is júzinde tanytyp, seriktesterdiń senimin arttyrady», dedi Almaty qalasy Týrızm basqarmasy basshysynyń orynbasary Aqmaral Eshanova.
Sondaı-aq Almaty – álemge aspanmen tildesken taýlarymen belgili. Bul rette taý klasterin de damytý qolǵa alynbaq. Aldaǵy ýaqytta osyndaı aımaqtardyń adam qabyldaý múmkindigin 5 esege arttyryp, táýligine 30 myń kelýshige deıin qabyldaý josparlanyp otyr.
Bul qala bıýdjetin tolyqtyryp, el ekonomıkasyn nyǵaıtýǵa septesedi. О́ıtkeni, taý shańǵysymen aınalysatyn árbir saıahatshynyń ortasha táýliktik shyǵyny 350 dollardy quraıdy. Al qaladaǵy taý klasteri jyl boıy jumys isteıdi. Qysta shańǵy tebilse, jazda velosıped pen haıkıng sportymen aınalysýǵa bolady.
Al kúz ben kóktemde ekologııalyq soqpaqtar – serýendeýge arnalǵan taptyrmas oryndar.
Aıta keteıin, 2018 jyldan beri Ile Alataý ulttyq parkine kelýshiler qatary 4,5 esege, al Shymbulaq taýly kýrortynda demalǵandar sany 2,5 esege ósken. Endi aldaǵy ýaqytta qalanyń saıahatshylar úshin tartymdy aımaqtaryn jobalaý jumystary ekologııalyq talaptardy saqtaı otyryp, qoǵamdyq talqylaý arqyly júzege aspaq. Osylaısha, týrızm túrlenip, arý qala Almaty odan saıyn kórkeıe túspek.
