Prezıdentke kezekten tys saılaý taǵaıyndaýǵa kedergi joq

ASTANA. 24 aqpan. Qazaqstan Respýblıkasy Konstıtýsııalyq keńesi Parlament Senaty tóraǵasynyń Qazaqstan Respýblıkasy Konstıtýsııasynyń Qazaqstan Respýblıkasy Prezıdentiniń kezekten tys saılaýyn taǵaıyndaý máselelerin retteıtin 41-baby 3-1-tarmaǵyna resmı túsindirme berý týraly ótinishi boıynsha normatıvtik qaýly qabyldady. Bul týraly Konstıtýsııalyq Keńestiń baspasóz qyzmeti habarlady. Konstıtýsııalyq Keńes Konstıtýsııanyń 41-baby 3-1-tarmaǵynyń normasyn Qazaqstan Respýblıkasy Prezıdentiniń Prezıdenttiń kezekten tys saılaýyn jeke-dara taǵaıyndaýǵa aıryqsha quqyǵy bar dep túsingen jón dep uǵyndyrdy. Elbasynyń Prezıdenttiń kezekten tys saılaýyn taǵaıyndaý týraly sheshim qabyldaýyna respýblıka Konstıtýsııasy qandaı da bir sharttar men shekteýler qarastyrmaıdy. «Mundaı saılaý taǵaıyndaý týraly sheshim qabyldaǵanda Qazaqstan Respýblıkasy Konstıtýsııasynyń 41-babynyń 3-tarmaǵynda qarastyrylǵan Qazaqstan Prezıdentiniń saılaýy merzimi jaǵynan respýblıka Parlamentiniń jańa quramyn saılaýmen tuspa-tus kelmeýge tıis degen ereje eskerilýi kerek», - delingen Konstıtýsııalyq keńestiń habarlamasynda. Eske salaıyq, 14 aqpan kúni Qazaqstan halqy assambleıasynyń keńesi azamattardyń Qazaqstan Prezıdentiniń kezekten tys saılaýyn ótkizý týraly ótinishterin biraýyzdan qoldaǵan edi. Assambleıa Keńesi músheleriniń pikirinshe, álem ekonomıkasyndaǵy daǵdarystyń órship turǵan jaǵdaıynda kezekten tys prezıdent saılaýyn ótkizý respýblıkaǵa «Nurly jol» baǵdarlamasy men el damýynyń uzaq merzimdi damý basymdyqtaryn iske asyrýǵa múmkindik beredi. Kezekten tys saılaý ótkizý týraly bastamany Qazaqstan Parlamenti - Májilis jáne Senat depýtattary qoldap, Memleket basshysyna saılaý ótkizýge ruqsat berý týraly ótinish joldady. Senat tóraǵasy Qasym-Jomart Toqaev Konstıtýsııalyq keńeske Konstıtýsııanyń Prezıdenttiń kezekten tys saılaýyn belgileý týraly 41-babynyń 3-1-tarmaǵyn resmı túsindirip berý jóninde ótinish bildirdi. Sáken Maılybaı.