Báseke zamanda kásip meńgergenniń bási joǵary

Platforma jumysyn bastaǵaly kúni búginge deıin shamamen 1,2 mln adam bilim alǵan. Munda oqy­ǵan 56,6 myń jumyssyz azamattyń shamamen 16,9 myńy – 16-35 jas ara­lyǵyndaǵy jas­tar. Olar negizinen Túrkistan (3,5 myń adam), Qostanaı (2,8 myń), Qyzylorda (2,5 myń), Almaty oblystarynan (2,2 myń), Almaty qalasynan (2,3 myń) eken. «Skills Enbek»-te sertıfıkat alǵan jumys­syzdardyń 56%-dan astamyn áıelder quraıdy (32 myń adam). Áıelderdiń eń joǵary úlesi Túrkistan (3,5 myń), Qostanaı (2,8 myń), Qyzylorda (2,6 myń) oblystarynda, sondaı-aq Almaty qalasy men Qaraǵandy oblysynda (árqaısysynda 2,3 myń adam). Bilim alǵandardyń shamamen 26 myńy aýyl turǵyndary. Olardyń basym bóligi Túrkistan (3,2 myń), Qyzylorda (2,9 myń) Almaty (2,6 myń) oblystarynan.

«Skills Enbek»-tiń sabaqtary iske qosylǵan sátten bastap avtorlar túrli baǵyttarda 1 000-nan astam kýrs jarııalasa, olardyń 382-si tegin negizde. Sabaqtardyń uzaqtyǵy 1 saǵattan 72 saǵatqa deıin jalǵasady. Byltyr eń tanymal kýrstar «IT jáne telekommýnıkasııalar», «Aspaz-kondıter», «Seniń mansaptyq bastamań: Elektrondyq eńbek bırjasyn qalaı paıdalanýǵa bolady», «Personaldy basqarý», «Pishý jáne tigý» bolypty. Platformada áleýmettik qyzmet kórsetý, basqa da baǵyttardaǵy tegin kýrstardyń sany turaqty túrde artyp keledi. Sebebi bul júıe halyqtyń bilim deńgeıi men kásibı biliktiligin arttyrýǵa, mansaptyq damýdy yntalandyrýǵa, «ómir boıy bilim alý» tujyrymdamasyn ilgeriletýge baǵyttalǵan. Qyz­metter naryǵynyń marketpleıs qaǵıdatyna sáıkes, onlaın-kýrstardy jyldam ári ońaı usynatyn halyqaralyq bilim berý platformalarynyń úlgisimen qurylǵan.

Onlaın oqýdan ótkisi kelgender oqý qarqynyn, tilin, materıaldy usyný tásilin óz betinshe tańdap, oqý barysyndaǵy óziniń deńgeıin qadaǵalaı alady. Oqýdy aıaqtaý úshin bilim alýshy 70% shekti deńgeıden tómen emes nátıjemen testileýden ótýge tıis. Tek kýrsty sátti aıaqtaǵan jaǵdaıda daǵdyny meńgergeni týraly sertıfıkat beriledi. Oqýdy aıaqtaýdyń mindetti sharty – kýrsqa baǵa berýmen baılanysty. Sertıfıkatty júkteý kezinde alǵan daǵdylarǵa sáıkes, bos jumys oryndaryna «Enbek.kz» saıtyndaǵy usynystar qosa beriledi. Qysqasy, sizdiń sertıfıkat alǵanyńyz týraly aqparat elektrondyq eńbek bırjasyndaǵy túıindemeńizde jańǵyryp shyǵa keledi.

«Skills Enbek»-te onlaın-kýrs­tardy ornalastyrý avtorlar men ázirleýshilerge tegin. Sabaqtar qazaq, orys, aǵylshyn tilderinde qoljetimdi. Ári aqparatty usynýdyń túrli formattaryn qamtýǵa tıis degen talap ta bar. Onyń ishinde mátin, tanystyrylymdar, beıne, aýdıomaterıaldar, ınfografıka bar. Platformada erekshe bilim berý qajettilikteri bar adamdarǵa ınterfeısti beıimdeý múmkindigi qarastyrylǵan.

О́tken Jumysshy maman­­dyqtar jyly aıasynda «Skills Enbek»-te mektep túlek­teri men tehnıkalyq, kásip­tik bi­lim beretin mekeme stýdent­te­rine arnalǵan kýrstar da jarııalanǵan. Onyń ishinde «Seniń mansaptyq bas­tamań: elektrondyq eńbek bır­jasyn qalaı paıdalanýǵa bolady» sabaǵy mamandyqtarǵa praktı­kalyq silteme retinde qyzmet etedi. Mamandyq tańdaýǵa, jumys izdeý men ózin tanys­tyrý daǵdylaryn meńgerýge, sondaı-aq elektrondyq eńbek bır­jasynyń quraldaryn tıim­di paıdalanýǵa kómektesedi. Búgin­de osy sekildi kýrstardan 529 myń mektep oqýshysy men stýdent ótken. Bul jobanyń sura­nysqa ıe ekenin bildiredi.