Myqtylar Melbýrn kortynda kezdesedi

121 jyldyq tarıhy bar dástúrli týrnırde esimderi ańyzǵa aınalǵan talaı sańlaqtyń top jarǵanyn kóziqaraqty kórermen jaqsy biledi. 1905 jyly tusaýy kesilgen jarysta jergilikti tennısshi Rodnı Hıttiń mereıi ústem boldy. Fınalda ol óziniń otandasy Artýr Kertısti qapy qaldyrdy. Ol kezdegi týrnır «Aýstralazııa» dep atalatyn. 1927–1968 jyldar aralyǵynda atalǵan doda «Aýstralııa birinshiligi» degen ataýǵa ıe boldy. Sol kezderi Roı Emersonnyń juldyzy jarqyraı jandy. Kvınslend shtatynyń týmasy alty márte aldyna jan salmady.

«Jańa dáýirdiń» (1969–1980) alǵashqy jyldary jasyl qur­lyqtyń ókili Ken Rozýoll tórt márte jeńimpaz atansa, Rod Leıver úsh ret dara shyqty. HH ǵasyrdyń 80-jyldary shvesııalyq Mats Vılander de dál sondaı nátıjege qol jetkizdi. Ǵasyrlar toǵysynda amerıkalyq Andre Agassı tórt týrnırde aldyńǵy lekten kórindi. Odan keıin Shveı­sarııanyń maq­tanyshy Rodjer Federer men Serbııanyń sańlaǵy Novak Djokovıchtiń ózara tartysy bastaldy. Uzaq ýaqyt boıy ekeýi eshkimge des bergen joq. 2004–2023 jyldar aralyǵynda reseılik Marat Safın, ıspanııalyq Rafael Nadal, shveısarııalyq Sten Vavrınkanyń ara-tura baqtary janǵany bolmasa, bas júlde negizinen joǵaryda esimderi atalǵan qos dúldúlge buıyrdy. Atap aıtsaq, Federer alty týrnırdiń jeńimpazy atansa, Djokovıch odan asyp tústi. Ol Norman Brýks kýbogin 10 ret tóbesine kóterdi. Aýstralııanyń ashyq birinshiliginiń rekordy dál osy serbııalyq sportshyǵa tıesili.

Keıingi eki jarysta Iаnnık Sınner jeńis toıyn toılady. 24 jastaǵy Italııanyń myqtysy 2024 jylǵy jarystyń fınalynda reseılik Danııl Medvedevten basym tússe, 2025 jyly germanııalyq Aleksandr Zverevten aılasyn asyrdy.

Áıelder arasyndaǵy tuń­ǵysh týrnır 1922 jyly uıymdas­tyryldy. О́tken ǵasyrdyń alǵashqy jartysynda jergilikti oıynshylar Dafna Akherst pen Nensı Ýınn-Boltonnyń qarqyny kúshti boldy. Alǵashqysy – bes, ekinshisi – alty márte top jardy. Kóp uzamaı Margaret Smıt-Korttyń juldyzy jarqyraı jandy. Olberıde dúnıege kelgen burymdynyń 11 márte mereıi ústem boldy. Bul rekordtyń kúni búginge deıin murty buzylmaı tur. Bertin kele áýeli Chehoslovakııanyń, odan keıin AQSh-tyń týy astynda óner kórsetken Monıka Selesh pen germanııalyq Shteffı Graff – tórt, taǵy bir ataqty amerıkalyq tennısshi Serena Ýılıams jeti jarysta qarsylas shaq keltirmedi. Keıingi úsh týrnırge toqtalatyn bolsaq, 2023, 2024 jyldary belarýstik Arına Sobolenko shashasyna shań juqtyrmady. Byltyr Medıson Kızdiń qarqynyna eshkim shydamady. 30 jastaǵy AQSh ókili fınalda sol Sobolenkoǵa san soqtyrdy.

Elimizdiń tennısshiler arasynda eń úzdik kórsetkish Elena Rybakınaǵa tıesili. 2023 jyly Melbýrndegi dodanyń bastapqy básekelerinde Elızabetta Kochcharetto (Italııa), Kaıa Iývan (Slovenııa), Danıel Kollınz (AQSh), Iga Shventekti (Polsha) utqan Lena shırek fınalda Elena Ostapenkony (Latvııa) eńserdi. Jartylaı fınalda Vıktorııa Azarenkony (Belarýs) jolynan yǵystyrdy. Alaıda Elenanyń fınalda Arına Sobolenkoǵa (Bela­rýs) áli jetpedi. Úsh settik báseke 6:4, 3:6, 4:6 esebimen aıaqtaldy.

Byltyrǵy jarys­ta Rybakına tórtinshi kezeńge deıin jetip, sol mejede Medıson Kızge (AQSh) ese jiberdi. Iýlııa Pýtınseva úshinshi aınalymda Darıa Kasatkınadan (Reseı) jeńildi. Jigitterimizdiń qarqyny tym báseń. Alek­sandr Býblık pen Aleksandr Shev­chenko tusaýkeser kezdesýlerinde je­ńilistiń kermek dámin tatty. Jasyl qurlyqta Býblık oıda-joqta Federık Serendolodan (Argentına) utylsa, Shevchenko sol kezde álemdik reıtıngte úshinshi orynda turǵan Kar­los Alkarasqa (Ispanııa) laıyqty qarsylyq kórsete almady.

Sanaýly kúnderden keıin jalaýy jelbireıtin Aýstralııanyń ashyq birinshiligi 1 aqpanda márege jetedi. Básekeler Iаrra ózeniniń boıyndaǵy «Melbýrn Parkta» ótedi. Bul jerde negizi úsh kort bar. Olar – «Rod Leıver Arenasy» (16 820 kórermenge eseptelgen), «Melbýrn Arena» (10 500), «Margaret Kort Arena» (6 000).

Melbýrnde elimizdiń tórt tennısshisi baq synaıtyny áý bas­tan belgili bolǵan. Olar – Elena Rybakına (WTA №5), Aleksandr Býblık (ATR №10), Aleksandr Shevchenko (ATR №104), Iýlııa Pýtınseva (WTA №106). Kóp keshikpeı uıymdastyrýshylar tarapynan Zarına Dıasqa (WTA №285) Wild Card berilgeni belgili boldy. Sóıtip, jarysqa qatysatyn jer­lesterimizdiń sany beseýge jetti.

Melbýrndegi jarystyń júlde qory bıyl 74,9 mln AQSh dollaryn qurap otyr. Byltyrǵy jylmen salystyrǵanda 16%-ǵa artqan. Jekelegen saıystaǵy jarys jeńimpazdary 2,79 mln alsa, fınalǵa shyqqandarǵa sol somanyń teń jartysy beriledi.