Foto: atameken.kz
«Atameken» UKP baspasóz qyzmetiniń málimdeýinshe, kezdesý barysynda qatysýshylarǵa ónimdi keri qaıtarýdyń sebepteri, aýqymy jáne aldaǵy is-qımyl tártibi jan-jaqty túsindirildi.
«О́nimdi erikti túrde keri qaıtarý 2026 jylǵy 5 qańtardan bastap qolǵa alyndy jáne Qazaqstandy qosa alǵanda, birqatar naryqtardy qamtıdy. Bul shara aldyn alý sıpatynda jáne syrtqy jetkizýshiden jetkizilgen shıkizatta serýlıd toksıniniń yqtımal bolýy múmkin degen qaýiptiń anyqtalýyna baılanysty», dep habarlady ShQO sanıtarııalyq-epıdemıologııalyq baqylaý departamenti.
Atalǵan ıngredıenttiń ónim quramyndaǵy mólsheri óte tómen ekeni, sondaı-aq Qazaqstannyń qoldanystaǵy zańnamasynda taǵam ónimderindegi serýlıd toksıniniń quramyna qatysty normatıvtik retteý joq ekeni atap ótildi.
Soǵan qaramastan, Nestle kompanııasy ónimdi keri qaıtarý týraly sheshim qabyldady.
Keri qaıtarýǵa ónimniń shekteýli assortımenti jatady, onyń ishinde:
- qurǵaq tez erıtin sútti, qyshqyl sútti jáne laktozasyz qospalar;
- emdik jáne dıetalyq tamaqtanýǵa arnalǵan amınqyshqyldary negizindegi qurǵaq qospalar.
Keri qaıtarylatyn naqty partııalardyń tizimi nestlebaby.kz saıtynda jarııalanǵan. Keri qaıtarý tek osy partııalarǵa qatysty – Qazaqstandaǵy Nestle kompanııasynyń balalarǵa arnalǵan ózge ónimderi satylymda qalady jáne qaýipsiz bolyp tabylady.
ShQO Kásipkerler palatasy dırektorynyń quqyqtyq máseleler jónindegi orynbasary Aıjan Jáńgirhanova Palata bıznesti ashyq ári ýaqtyly aqparattandyrý alańy bolǵanyn atap ótti.
«Kásipkerler úshin ýákiletti organdardan resmı ári senimdi aqparatty tikeleı alý asa mańyzdy. Bul jaǵdaıda áńgime kompanııanyń korporatıvtik jaýapkershiligi sheńberinde júrgizilip jatqan erikti ónimderdi keri qaıtarý týraly bolyp otyr jáne ol anyqtalǵan zańbuzýshylyqtardyń saldary emes. Bizdiń mindetimiz – bızneske quqyqtyq aspektilerdi túsindirip, alańdaýshylyqtardy joıý», dedi A.Jáńgirhanova.
Sheteldik marketpleısterde saýda jasaý: el azamattary úshin ne ózgeredi?
