Vedomstvonyń naqtylaýynsha, 14 qańtar kúni keshke polısııaǵa Petropavl qalasyndaǵy 314-atqyshtar dıvızııasy kóshesindegi úılerdiń birinde turatyn 75 jastaǵy áıeldiń joǵalyp ketkeni týraly aryz túsken.
Anyqtalǵandaı, sol kúni shamamen saǵat 13:00-de zeınetker áıel ózdiginen úıinen shyǵyp, aýrýhanaǵa bet alǵan, alaıda qaıta oralmaǵan. Uıaly telefony sóndirýli kúıde bolǵan.
«Izdeý jumystaryna qalalyq polısııa basqarmasy men oblystyq polısııa departamentiniń qyzmetkerleri, SOBR jaýyngerleri, Ulttyq ulan áskerı qyzmetshileri, sondaı-aq eriktiler jumyldyryldy. Izdeýge 60-tan astam adam qatysty. Aýa temperatýrasynyń tómen bolýy jumystardy edáýir qıyndatty. Joǵalýdyń yqtımal nusqalary qarastyrylyp, múmkin bolatyn oryndar tekserildi, kóshe beınebaqylaý kameralarynyń jazbalary zerdelendi. Alaıda qarańǵy ýaqytta joǵalǵan adamnyń júrgen jerin anyqtaý múmkin bolmady», dep habarlady óńirlik polısııa departamenti.
15 qańtar kúni tańerteń qart áıeldi ýchaskelik ınspektor aýrýhana mańyndaǵy sharýashylyq ǵımarattyń janynda, adam sırek júretin aýmaqtaǵy qorshaý mańynan tapqan.
Áıel aýyr jaǵdaıda bolǵan, qatty tońýdyń saldarynan baılanysqa shyǵa almaǵan. Ol dereý jedel járdem brıgadasyna tapsyrylǵanymen, ókinishke qaraı, onyń ómirin saqtap qalý múmkin bolmady.
Atalǵan derek boıynsha polısııa zeınetker áıeldiń ólimine qatysty qylmystyq is qozǵady.
Búgin elimizdiń 12 óńirinde aýa raıyna baılanysty daýyldy eskertý jarııalandy.
