«Qazaqstan boks federasııasy prezıdentiniń buıryǵymen Qaırat Sátjanov QBF jattyqtyrýshylarmen jumys jónindegi vıse-prezıdenti qyzmetine taǵaıyndaldy», delingen federasııa taratqan habarlamada.
Aıta keteıik, Qaırat Sátjanovtyń ornyna Qazaqstan erler quramasynyń bas jattyqtyrýshysy qyzmetine Nurjan Nasanov taǵaıyndaldy.
Salada 35 jyldan asa tájirıbesi bar Qaırat Sátjanov bas bapker retindegi qyzmetin qorytyndylady.
«1,5 jyl bas jattyqtyrýshy qyzmetinde qoldan kelgendi aıanyp qalmadyq, biliktiligimizdi, kóp jyldyq tájirıbemizdi salyp jumys atqardyq. Osy ýaqyt aralyǵynda úlken jetistikterge jettik dep oılaımyn. Byltyr qańtarda Ispanııada ótken, aqpan aıynda Bolgarııada ótken «Strandja» týrnırinde komandalyq esepte 1-shi oryn aldyq. Atalǵan týrnırde elimiz egemendik alǵaly eki altyn alǵan eken. Biz osy synda 5 altyn júlde ıelendik. Odan bólek Serbııada, Nıderlandyda ótken jarystarda komandalyq esepte alǵa shyqtyq. Qazaqstanda ótken álem kýbogi kezeńinde de osy nátıjeni qaıtaladyq. Lıverpýlde ótken álem chempıonatynda tarıhqa enip, uldar, qyzdar quramasy birigip 7 altyn medal ıelenip, jalpy esepte top jardyq. IBA uıymdastyrǵan álem birinshiliginde 3 altyn júldemen Reseıden keıin 2-shi orynǵa turaqtadyq», dedi Qaırat Sátjanov.
Búgin Qazaqstan boks federasııasy Qaırat Sátjanovqa qurmet kórsetip, Toyota Land Cruiser 300 avtokóligin jáne Astana qalasynan 3 bólmeli páter kiltin tabystady.
