Sol jeńimpaz shyǵarma, «Tergeýshi» atty roman, 398 bettik kitap bolyp shyqqany keshe ǵana. Shyǵarma qatardaǵy týyndy emes, dúnıege kele sala qatarynan qara úzgeni, ile kitap retinde jaryq kórgeni. О́zi avtor ári baspager bolǵandyqtan dızaıny, qattalýy óte tamasha. Kitap qalyń bolsa da, salmaǵy jep-jeńil. Muqabasy qatty. Ázirge myń danamen naryqqa shyǵypty. Al avtorǵa kelsek, buǵan deıin bir roman usynyp, prozalyq jınaǵy shyǵyp úlgergen jazýshy, baspager. Kitap isimen aınalysyp júrgen Arman Álmenbet rýhanııat dese janyp turǵan qazaq. Buryn kitap dúkenderinde biren-saran ǵana qyltıyp turatyn qazaq kitaptary qazir «Meloman», «Marvın» dúkenderinde syqap turmasa da, bir buryshyn qampaıtýǵa jeteǵabyl. Atsalysqan osyndaı jigitterdiń arqasy. Jazýshy, sondaı-aq keıingi jyldary shyqqan «Sóztúzer», «Kommentator sózdigi» kitaptary avtorlarynyń biri. О́zi qattap shyǵarǵan myna «Tergeýshi» kitabyn úsh jyl jazǵanyn aıtady.
«Alystaǵy maldy aýyldarda jasalatyn irili-usaq qylmystyń qaı-qaısysy bolsa da tirkelgen jaǵdaıda tergeýshiniń aldyna keledi. Eleýsiz adamdardyń taǵdyryna tergeýshi kýá. Olar tap bolǵan aýyrtpalyq pen kenelgen qýanysh jumysty janyn salyp isteıtin tergeýshiniń kóz aldynda. Ár is ózinshe maıdan. Sol maıdanda tergeýshi jeńe me, qylmysker jeńe me?» delingen kitaptyń qysqasha túsiniginde.
