Sońǵy kezderi aıshyqty ónerimen jankúıerlerdi qýantyp júrgen erler arasyndaǵy elimizdiń birinshi raketkasy Aleksandr Býblık (ATR №10) Djenson Brýksbımen sheberlik baıqasady. 25 jastaǵy AQSh-tyń ókili pálendeı tabystarǵa qol jetkize alǵan emes. Eń úzdik kórsetkishi – osydan bes jyl buryn «US Open» dodasyna deıin jetip, ATR týrnırinde bir márte top jarýy. Al Aleksandrdyń qazirgi qarqyny keremet. Byltyr otandasymyz ATR-diń tórt birdeı týrnırinde jeńimpaz atansa, jyl basynda Gonkongta ótken jarysta da aldyna jan salmady. Bul jaǵdaı Býblıktiń Melbýrnde úzdikter sanatyna qosylýǵa zor múmkindigi bar ekenin ańǵartady. Elimizdiń taǵy bir tanymal tennısshisi Aleksandr Shevchenkonyń qarsylasy irikteý syny aıaqtalǵannan keıin anyqtalady.
Áıelder arasyndaǵy el úzdigi Elena Rybakına (WTA №5) Kaıa Iývanmen (WTA №97) kezdesedi. 25 jastaǵy slovenııalyq sulýdyń aýyz toltyryp aıtarlyqtaı tabysy joq. Sol sebepti talaı dúrmekterde dara shyqqan ákki Elenaǵa bul qarsylasyn qapy qaldyryp, kelesi kezeńge ótý esh qıyndyq týǵyza qoımas dep oılaımyz. Iýlııa Pýtınseva (WTA №105) Beatrıs Addad Maııamen (№ 59 WTA) kúsh synasady. Bıyl jazda 30 jasqa tolǵaly otyrǵan Brazılııanyń oıynshysy juptyq básekede óte myqty. 2022 jyly Aýstralııa ashyq birinshiliginiń fınalyna deıin jetti. Jekelegen synda WTA-nyń tórt týrnırinde top jaryp, Rolan Garrostyń jartylaı fınalynda oınady.
Wild-card arqyly Melbýrndegi básekede baq synaý múmkindigine ıe bolǵan Zarına Dıas (WTA № 285) Paýla Badosaǵa (WTA № 25) qarsy shyǵady. Dál qazir Ispanııa sportshysynyń bizdiń qyzǵa qaraǵanda qarqyny edáýir kúshti ekeni daýsyz. 28 jastaǵy Pıreneı túbeginiń týmasy byltyr dál osy týrnırde úzdik tórtikke endi. Onyń aldynda Rolan Garros pen AQSh-tyń ashyq birinshiliginiń shırek fınalyna shyǵyp, álemniń ekinshi raketkasy atandy.
