Ortalyq COVID-19 pandemııasy kezinde týyndaǵan syn-qaterlerdi eskere otyryp salyndy. Onyń basty maqsaty – densaýlyq saqtaý júıesiniń tótenshe jaǵdaılarǵa daıyndyq deńgeıin arttyrý, ǵylymı áleýetti damytý, zamanaýı sıfrlyq sheshimderdi engizý jáne bilikti kadrlar daıarlaý. 350 tósektik orynǵa eseptelgen jańa medısınalyq mekeme jyl saıyn elimizdiń túkpir-túkpirinen týberkýlezge shaldyqqan 2,5 myń naýqasqa emdeý-dıagnostıkalyq qyzmet kórsetýge múmkindik beredi.
«Bul ortalyq Prezıdent tapsyrmasymen ult densaýlyǵyn nyǵaıtý jáne bıologııalyq qaýipsizdikti qamtamasyz etý maqsatynda boı kóterdi. Búginde munda ǵylymı zertteýler, ozyq tehnologııa, bolashaq mamandardy tárbıeleý baǵyttary ózara sabaqtasyp, birtutas júıege aınalyp otyr. Infeksııalyq aýrýlardyń ulttyq ǵylymı ortalyǵy óskeleń urpaqtyń densaýlyǵyn saqtaýǵa, ulttyq qaýipsizdikti nyǵaıtýǵa, otandyq medısınalyq ǵylymdy damytýǵa zor úles qosady dep senemin», dedi Aıda Balaeva.
Premer-mınıstrdiń orynbasary Memleket basshysynyń tapsyrmasyna sáıkes elimizde densaýlyq saqtaý nysandarymen qatar áleýmettik ınfraqurylym da qarqyndy damyp jatqanyn atap ótti.
«Keıingi eki jylda elimizde 695 jańa medısınalyq nysan, 614 myń orynǵa arnalǵan 419 jańa mektep salyndy. Bul 19 apatty mektepti joıýǵa, 58 mekteptegi úsh aýysymdy oqytý máselesin sheshýge, 190 mekteptegi oqýshy oryndarynyń tapshylyǵyn azaıtýǵa múmkindik berdi. Sonymen qatar 237 sport nysany paıdalanýǵa berildi, onyń ishinde 69-y qalalarda, 168-i aýyldyq jerlerde ornalasqan. 2025 jyly 61 mádenıet nysanynyń qurylysy aıaqtaldy. О́ńirlerde 251 nysanda jóndeý jumysy júrgizilip jatyr. Bul ózgerister, eń aldymen, halyqtyń ómir sapasyn arttyrýǵa, áleýmettik qorǵaýdy nyǵaıtýǵa baǵyttalǵan», dep atap ótti A.Balaeva.
Is-shara barysynda jınalǵandar ortalyq bólimshelerin aralap kórip, mekemeniń ınfraqurylymymen, jabdyqtalýymen tanysty. Sonymen qatar mekeme ujymymen de kezdesý ótti.
Aıta keteıik, Infeksııalyq aýrýlardyń ulttyq ǵylymı ortalyǵy qysqa merzimde salynǵan. Munda klınıkalyq kómek kórsetý, ǵylymı jumys júrgizý, bilim berý, sıfrlyq tehnologııalardy paıdalaný sekildi múmkindikter bar. Ortalyq balalar men júkti áıelderge de medısınalyq kómek kórsetedi. Tótenshe jaǵdaılar kezinde jedel túrde 500 tósektik orynǵa deıin keńeıtilýi múmkin.
IAUǴO – dıagnostıka men emdeýdi ǵana emes, ınfeksııalyq jáne parazıttik aýrýlar, sonyń ishinde dárige tózimdi týberkýlez túrleri boıynsha kúrdeli zerthanalyq zertteýler júrgizýge qabiletti tolyqqandy medısınalyq mekeme. Ortalyq ulttyq deńgeıdegi ınfeksııalyq qaýip-qaterlerge júıeli túrde jaýap beretin, sondaı-aq ǵylymı jańalyqtardy damytyp, ınfeksııalyq aýrýlar salasynda mamandardy kásibı daıarlaıtyn jetekshi bazaǵa aınalýdy kózdeıdi.
ALMATY
