Stadıon qurylysy týraly alǵash ret 2024 jyldyń sáýir aıynda belgili boldy. Joba el astanasynyń shet aımaǵynda ornalasqan Orok aýylynda júzege asyrylyp jatyr. Alǵashqy kúnnen-aq nysannyń sáýlettik kelbeti kópshiliktiń nazaryn aýdardy. Arhıtektýralyq tujyrymdamanyń negizine qyrǵyzdyń ulttyq kıiz úıiniń beınesi alynǵan.
Dıametri 280 metr, bıiktigi 70 metr bolatyn segiz qabatty ǵımarat Azııa fýtbol konfederasııasynyń jańartylǵan talaptaryna saı salynyp jatyr. Bastapqyda stadıon 45 myń orynǵa eseptelgenimen, keıin syıymdylyǵy 51 myńǵa deıin ulǵaıtyldy. Mundaı aýqym Azııa kýbogynyń ashylý saltanatyn, sondaı-aq týrnırdiń alǵashqy jáne fınaldyq matchtaryn ótkizýge múmkindik beredi.
Nysannyń tehnıkalyq kórsetkishteri de tańdaı qaqtyrady: kógaldandyrý aýmaǵy − 70 myń sharshy metr, qurylys alańy − 180 myń sharshy metr, stadıonnyń óz aýmaǵy − 85 myń sharshy metr. Joba aıasynda 3 600 avtokólikke arnalǵan jabyq avtoturaq pen 60 myń sharshy metr tehnıkalyq bólmeler qarastyrylǵan.
Qyzylordadaǵy 21 mlrd teńgege salynǵan stadıon ÝEFA tekserisinen qashan ótedi?
Qurylysshylar jaryqtandyrý men alań jabynyna erekshe kóńil bólmek. Fýtbol alańy FIFA boıynsha A sanatyndaǵy LED-jaryq júıesimen jabdyqtalady. Al halyqaralyq uıymdar aıasyndaǵy oıyndar úshin gıbrıdti gazon tehnologııasy qoldanylady.
Stadıon Bishkektegi kópfýnksıonaldy sporttyq habtyń bir bóligine aınalady. Onyń aýmaǵynda 35 myń sharshy metr jerde saýda ortalyqtary men sport dúkenderi boı kótermek.
Jobaǵa halyqaralyq mamandar tartylǵan. Negizinen Túrkııadan kelgen arhıtektorlar, ınjenerler men konstrýktorlar eńbek etýde. Sonymen qatar qurylys barysyna Túrkııa men Ulybrıtanııadan kelgen sarapshylar keńes berip otyr. El basshylyǵynyń aıtýynsha, jobanyń qarjylandyrý máselesi smeta bekitilgen kezeńde-aq tolyq sheshilgen. Naqty quny resmı jarııalanbaǵanymen, buǵan deıin BAQ-ta jobanyń 60 mıllıon AQSh dollary shamasynda ekeni málim boldy.
Qazirgi tańda Bishkek Arena halyqaralyq stadıonynda monolıtti jumystar tolyq aıaqtalǵan. Stadıon 80 paıyzǵa daıyn. Úkimet ókilderiniń málimetinshe, trıbýnalar men barlyq fýnksıonaldy aımaqtarda múmkindigi shekteýli jandarǵa arnalǵan arnaıy oryndar men qolaıly jaǵdaılar qarastyrylady.
Stadıonnyń resmı ashylýy 2026 jyldyń tamyz aıyna, Qyrǵyzstannyń Táýelsizdik kúnine josparlanǵan.
