Polisia.kz-tiń jazýynsha 17 qańtar kúni saǵat 07:33-te Ekibastuz qalasyndaǵy sý qoımasynda Mitsubishi Delica markaly avtokóliktiń muz oıylyp, sýǵa batyp ketkeni týraly habarlama túsken. Atalǵan kólikte balyq aýlaýǵa shyqqan tórt azamat bolǵan.
Oqıǵa ornyna jedel túrde ýchaskelik polısııa ınspektory Arhar Ospanov jetip, avtokólik pen balyqshylardyń ornyn anyqtaǵan. Keıin ol koordınattardy jedel-tergeý tobyna jáne tótenshe jaǵdaılar qyzmetine jetkizgen.
Aqmola oblysynda 45 jastaǵy balyqshy sýǵa batyp kóz jumdy
– Júrgizilgen is-sharalardyń nátıjesinde tórt er adam da qutqarylyp, olarǵa alǵashqy medısınalyq kómek kórsetildi. Qutqarý kezinde olar qatty tońǵan. Sýǵa túsken kıimderi muz bolyp qatyp qalǵandyqtan, birden kólikke otyra almady. Shalbarlaryn qaıshymen kesýge týra keldi. Balyqshylardyń eshqaısysy jaraqat alǵan joq, barlyǵy úsip qalý belgilerimen aýrýhanaǵa jetkizildi, – dedi Ekibastuz qalalyq polısııa basqarmasynyń bastyǵy Tólegen Qudaıbergenov.
Vedomstvo málimetinshe, er adamdar eskertýlerge jáne qatty aıazǵa qaramastan balyq aýlaýǵa shyqqan. Muz ústine shyǵyp, qural-jabdyqtaryn túsirgennen keıin avtokólik muz astyna ketip, ony shyǵarý múmkin bolmaǵan.
Polısııa azamattardyń qaýipsizdigi birinshi orynda ekenin atap ótip, turǵyndardy qatty aıaz kezinde alys jolǵa shyqpaýǵa jáne saqtyq sharalaryn qatań saqtaýǵa shaqyrdy.
