Dál osy jyldarda tanymal kásipker, mesenat Nurlan Smaǵulov ta búkilálemdik beıneleý óneriniń jaýharlaryn, qazaqtyń aıtýly qylqalam sheberleriniń týyndylaryn jınaýmen bolǵan. Ýaqyt óte kele otandyq bıznestegi belgili tulǵa balamasy joq osy baılyqty óziniń týǵan shaharyna syıǵa tartyp, muraǵa qaldyrýǵa sheshim qabyldaǵanyn bilemiz. Bir sózben aıtqanda, megapolıstegi Almaty Museum of Arts osylaı dúnıege kelgen.
Aqıqatynda Almaty Museum of Arts Qazaqstandaǵy eń mańyzdy mádenı jobalardyń biri ekenin joqqa shyǵarýǵa bolmaıdy. Biraq ol qalaı júzege asty desek, taıaý kúnderi onyń ǵajaıyp tarıhyn tamasha baıandaıtyn «Qıylystaǵy murajaı» derekti fılminiń tusaýy kesildi.
2026 jyly qandaı taqyryptarda kıno túsirýge bolady?
Tórt jyl boıy túsirilgen fılm orasan iri ıdeıany júzege asyrýǵa qol jetkizgen mesenat ári kolleksıoner Nurlan Smaǵulov pen jubaıy Mádına Smaǵulovanyń ishki tolǵanysynan bastalyp, álemdik mádenı kartada oıyp turyp oryn alǵan keńistiktiń ómirge kelýine deıingi úderisti kórsetedi. Kórermen bir demmen HH ǵasyrdaǵy qazaq ónerine tıesili jeke kolleksııanyń qalaısha murajaıdyń ózegine aınalǵanyna, búginde onyń myńdaǵan qonaq qabyldaıtyn orta retinde qalyptasqanyna kýáger bolady.
«Qıylystaǵy murajaı» kartınasyn derekti fılmderimen tanymal bolǵan jýrnalıst ári prodıýser Andreı Loshak irgetasy qalanǵannan bastap, 2025 jylǵy 12 qyrkúıektegi ashylýyna deıingi kezeńdi ishten baqylap, taspaǵa túsirip otyrǵan.
«Bul murajaı jyldar boıǵy armanymnyń ǵana emes, qoǵam men el aldyndaǵy belgili bir boryshymnyń óteýi ispetti. Álem aralap, iri murajaılardy kórgen saıyn Almaty dál osyndaı keńistikke, ıaǵnı, óner qoljetimdi bolatyn, adamdar bas qosyp, mádenıet týraly jańa áńgime quratyn orynǵa laıyq dep oılaıtynmyn», deıdi Almaty Museum of Arts negizin qalaýshy Nurlan Smaǵulov.
Fılm tek arhıtektýralyq sheshimder men Nazarbaev pen ál-Farabı dańǵyldarynyń qıylysyndaǵy ǵımarat qurylysy týraly ǵana emes, ıdeıanyń týýy, izdenisterden bastap, kópsatyly logıstıka men sheber kýratorlyq sheshimderge deıingi úderisti, ıaǵnı, óner týyndylarynyń kúrdeli ári kóbine kózge kórinbeıtin jolynan habardar etedi. Kadrda Iаıoı Kýsama, Bıll Vıola, Rıchard Serra, Anselm Kıfer, Jaýme Plensa, Iınka Shonıbare men Alısııa Kvade syndy esimi kúlli álemge máshhúr sheberler eńbekteriniń qazaqstandyq ónermen dıalogy kórsetiledi.
Aıtqandaı, derekti fılmdi aldaǵy eki boıy murajaıǵa kirý bıleti bar barlar qazaq, aǵylshyn tilindegi sýbtıtrlermen tegin tamashalaı alady.
Osy kúnderi tusaýy kesilgen «Qıylystaǵy murajaı» – murajaı men onyń jaýhar týyndylary týraly qos derekti fılmniń alǵashqysy. Aldaǵy kóktemde 60-shy jyldardaǵy otandyq qylqalam sheberleriniń týyndylaryna áspetteıtin ekinshi fılmniń premerasy ótpek. Ekinshi bólimi – keńes zamanynda qazaq óneriniń qaıtalanbas stılin qalyptastyrǵan talantty býyn ókilderine arnalmaq.
Ulttyq kınonyń ustyny: 2025 jylǵy jetistikter men jańa múmkindikter
