Saltanatty rásimge áskerı bólimniń ardagerleri, Almaty qalasy men Almaty oblysy boıynsha «Analar júregi» sarbazdar analary komıtetiniń ókili Tatıana Tropına, almatylyq jedel quramanyń basshylyǵy, sondaı-aq sarbazdardyń ata-analary men týystary qatysty.
Ant berý rásimindegi tosynsyı: Astanada sarbaz súıiktisine usynys jasady
Saltanatty jıynda sóz sóılegen 5571 áskerı bóliminiń komandıri, polkovnık Maqsat Baımaǵulov jas sarbazdardy mańyzdy tarıhı sátpen quttyqtap, olardyń aldaǵy qyzmetine sáttilik tiledi.
– Búgin áskerı bólimde erekshe ári mańyzdy oqıǵa bolyp otyr. Jas sarbazdardyń áskerı ant qabyldaýy – biz úshin mártebeli kúnderdiń biri. Osy sát ómirlerińizde máńgi este saqtalatynyna senimdimin. Búginnen bastap sizder Qazaqstan Respýblıkasy Ulttyq ulanynyń sarbazdary qataryna resmı túrde qosyldyńyzdar. Endi el tynyshtyǵyn senimdi qorǵap, áskerı boryshtaryńyzdy adal atqaryńyzdar. Ulttyq ulannyń atyn, onyń baı áskerı dástúrin abyroımen jalǵastyrý – sizderdiń basty mindetterińiz, – dedi brıgada komandıri.
Osylaısha, jas jaýynger kýrsynan ótken jáne áskerı ant qabyldaǵan sarbazdar búginnen bastap elimizdiń zańdylyǵy men qoǵamdyq qaýipsizdigin qamtamasyz etetin Ulttyq ulan áskerı qyzmetshilerimen bir sapta qyzmet etetin bolady.
Esterińizge sala keteıik, 5571 áskerı bóliminiń jeke quramy ońtústik astananyń qoǵamdyq-saıası, sporttyq, mádenı is-sharalaryna, sondaı-aq megapolıstegi qoǵamdyq tártipti saqtaýǵa belsendi qatysady.
Ant bergen sarbazdar jaqyn arada Almaty kóshelerinde quqyqtyq tártipti qamtamasyz etý jónindegi mindetterdi oryndaýǵa kirisedi.
