«Forte trio» memlekettik trıosy – elimizdegi eń tanymal kameralyq-aspaptyq ansamblderdiń biri. Ártister tek elimizde ǵana emes, sonymen birge shetelde de qurmetke ıe ári keńinen tanylǵan. Shyǵarmashylyq ujymnyń asa baı repertýaryna barokkodan djazǵa deıingi túrli stılder men baǵyttaǵy týyndylar engen. Trıonyń túrli orkestrler, solıster, vokalıster jáne aspapshylarmen birlesken óner kórsetýleri úlken jetistikke ıe. «Forte Trio» únemi qazaq ónerin aıtýly álemdik alańdarda pash etip keledi.
Aıta keteıik, ilgerirekte Mosarttyń minezi haqynda maqala jarııalanǵan edi.
Trıonyń quramynda oryndaýshylyq ónerdiń áıgili sheberleri, respýblıkalyq jáne halyqaralyq baıqaýlarynyń laýreattary bar. Ansambldi belgili pıanıst, professor, Qazaqstannyń eńbek sińirgen qaıratkeri Tımýr Ýrmancheev qurǵan bolatyn. Ol klassıkalyq ansamblge skrıpkany (Maqsat Júsipov), vıoloncheldi (Murat Narbekov) jáne fortepıanony (maestronyń ózi oınaıdy) biriktirdi. Aspaptardyń quramy jaǵynan elimizdegi alǵashqy jáne jalǵyz mýzykalyq ujym.
Bul keshte kompozıtor Dmıtrıı Shostakovıchtiń dara bolmysyn aıqyn kórsetetin kameralyq mýzykalyq shyǵarmalary oryndalady. Týyndylar onyń erekshe kórkemdik stılin, tereń dramatızm, ıntellektýaldyq mazmun jáne jańashyl sheshimderdiń úılesimin beıneleıdi. 23 qańtar, 19:00-de Roza Baǵlanova atyndaǵy «Qazaqkonsert» MAKU-ǵa asyǵyńyz.
