Sýret: opennews.kz
Resmı derekke súıensek, búgingi tańda Shymkentte 1 mıllıonnan astam adam, ıaǵnı halyqtyń 81,7%-y MÁMS júıesine tirkelgen. Onyń ishinde jeńildik sanatyndaǵy 800 myńǵa jýyq azamattyń jarnasyn memleket tólep otyr. Deı turǵanmen, qalada júıege kirmeı qalǵan áleýmettik turmysy tómen 55 362 azamat bar. MÁMS-tegi sońǵy ózgerister dál osy sanattaǵy jandardy qoldaýǵa baǵyttalǵan. Memleket basshysynyń tapsyrmasyna sáıkes, 2026 jyldan bastap áleýmettik turǵydan álsiz D, E sanatyndaǵy azamattar medısınalyq kómekke júgingen jaǵdaıda, olardyń saqtandyrý jarnasyn jergilikti atqarýshy organdar tóleıtin bolady. Mamandar muny osal topqa qoldaý kórsetýdi kúsheıtip, olardyń qajetti emdi ýaqtyly alýyna jol ashatyn tıimdi reforma dep baǵalap otyr.
Júıe engizilgeli beri shaharda medısınalyq qyzmetterdiń órisi keńeıdi. Búginde Shymkentte 177 medısınalyq uıym jumys istese, onyń 34-i memlekettik, qalǵany – jekemenshik emhanalar. Eń bastysy, ár turǵyn ózine qolaıly dárigerdi nemese emdeý mekemesin qalaýynsha tańdaı alady. №1 qalalyq klınıkalyq aýrýhanasynyń bas dárigeri Baqytjan Pozılovtiń aıtýynsha, ótken jyly aýrýhanada 43 naýqasqa MÁMS sheńberinde joǵary tehnologııalyq medısınalyq kómek kórsetilgen. Jalpy, sońǵy bir jyl ishinde munda saqtandyrý júıesimen 14 938 naýqas emdelip, onyń 7 206-syna túrli operasııa jasalǵan.
«Qazirgi ýaqytta bizdiń klınıkalyq aýrýhana 530 tósek orynnan turady. Stasıonarda myńnan astam adam, onyń ishinde ǵylym kandıdattary men joǵary sanatty dárigerler qyzmet etedi. Mamandardyń deni sheteldik klınıkalarda biliktiligin arttyryp kelgen. Aýrýhana eń ozyq dıagnostıkalyq quraldarmen jabdyqtalǵan. Munda asqazan-ishek joldaryna, baýyr, ót, óńeshke kúrdeli operasııalar jasalady. Dárigerlerimiz jambas býynyn aýystyrýdy, endoprotezdeýdi tolyq meńgerdi. Buryn mundaı qıyn operasııalardy jasatýǵa turǵyndar Astana, Almaty qalalaryna nemese shetelge sabylatyn. Qazir ýrologııa, búırek, zár shyǵarý joldaryna qatysty operasııanyń barlyq túri osynda jasalady», deıdi bas dáriger.
Emhanada quny 995 mln teńge turatyn jańa rentgendik angıografııalyq qondyrǵy iske qosylǵan. Bul qurylǵy 3D keskininde tamyrlardy tekserip, operasııa ústinde kompıýterlik tomografııa jasaýǵa múmkindik beredi. Osynyń kómegimen ınsýlt alǵan, mı tamyrlary men bas isikteri bar naýqastarǵa kúrdeli operasııalar jasalyp keledi. Búginge deıin dárigerler transplantasııa boıynsha kóptegen operasııa júrgizip, 244 búırek pen 32 baýyr aǵzasyn almastyrǵan.
MÁMS nátıjesinde buryn qoljetimsiz bolǵan qymbat operasııalar qarapaıym halyqqa tegin jasala bastady. Máselen, byltyr Shymkentte 1 júrek, 17 búırek almastyryldy. Olardyń árqaısysynyń quny 10 mln teńgege deıin barady. Al sońǵy bes jylda júrek ortalyǵynda 23 naýqasqa quny 77 mln teńge turatyn jasandy júrek qoıyldy. Qaltasy kótere bermeıtin mundaı shyǵyndardy saqtandyrý qory tolyq ótep, qanshama adamnyń ómirin uzartty.
Áleýmettik medısınalyq saqtandyrý qorynyń Shymkent qalasy fılıaly dırektorynyń orynbasary Arapkúl Izbasarovanyń málimdeýinshe, ótken jyly myńǵa jýyq naýqas joǵary tehnologııalyq kómek alǵan. Maman MÁMS-ti jınaqtaýshy júıemen shatastyrmaý qajettigin eskertedi. Árbir naýqas qansha jarna tólese de, qajetti medısınalyq qyzmettiń kez kelgen túrin tolyq kólemde alýǵa quqyly. Sonymen qatar emhanalar pasıentterge MÁMS júıesinde jumys isteıtin jekemenshik klınıkalarǵa da joldama bere alady. Bul jaǵdaıda qyzmet quny Qor tarapynan tólenedi, naýqas eshqandaı shyǵyn shyǵarmaıdy. Eger naýqas qajetti qyzmetke joldama ala almasa, emhana janyndaǵy Pasıentterdi qoldaý qyzmetine nemese Qorǵa resmı ótinish bildirýine bolady.
ShYMKENT
