Qumarpazdar qataryn sıretken qujat

Memlekettik keńesshi Erlan Qarın Telegram arnasyndaǵy jazbasynda Ulttyq quryltaı osy ýaqyt ishinde el qoǵamyn ortaq maqsatqa ju­myldyrýǵa arnalǵan biregeı ıdeıa­lar men stra­tegııalyq qadamdar usynatyn eń bas­ty ınstıtýtqa aınalǵanyn atap ótti. Onyń aıtýynsha, quryltaı músheleri osy qurylymnyń buǵan deıingi tórt otyrysy men jumys kezdesýlerinde kóptegen bastama kóterip, onyń basym bóligi oryndaldy.

Túrkistandaǵy ekinshi otyrystyń nátıjeleri anaǵurlym aýqymdyraq boldy. Ulttyq quryltaı elimizdiń qoǵamdyq-saıası ómirine tikeleı septigin tıgizetin 11 zańnyń qabyl­danýyna jol ashty. Ásirese «Qazaq­stannyń Halyq jazýshysy» ataǵyn qaıtarý týraly», «Onomastıka jumysyn júıeleý týraly», «Veıp­terge, shegýge kelmeıtin temeki ónimderine tyıym salý týraly túzetýler»; «Qumar oıyn bıznesi, lote­reıalar jáne lotereıa qyzmeti máse­leleri týraly», «Memlekettik nagradalarǵa uqsas qoǵamdyq nagra­dalardy daıyndaýǵa jáne mara­pattaýǵa tyıym salý týraly» zańdar kóptiń oıynda júrgen kókeıkesti máselelerge núktesin qoıdy.

Bul rette aırandaı uıyp otyr­ǵan talaı otbasyǵa tajaldaı tıgen qumar oıyndardyń naǵyz ulttyq qasiretke aınalyp bara jatqany belgili. Ulttyq quryltaıdyń úshinshi otyrysynda Prezıdent Qasym-Jomart Toqaev 400 myńǵa tarta aza­mat­tyń býkmekerlik keńse­ler men ka­zınolardyń turaqty klıen­t­i bolǵa­nyn, bul tutas bir qala hal­qy­nyń sanyna teń sıfr ekenin aıtty.

«Shyn máninde, lýdomanııa – beıbit kúnde eldiń shyrqyn buzyp jatqan qater. Sonyń kesirinen talaı shańyraq shaıqaldy. Talaı azamat zań buzyp, qylmysqa uryndy. Qumar oıyn úshin qaryzǵa batyp, ózine qol jumsaǵan jandar týraly habarlar, ókinishke qaraı, kún saıyn tarap jatady. Bul dert jas urpaqqa óte úlken zııan keltiredi», degen Prezıdent sózin resmı reıtıng málimetteri de rastaıdy.

Lýdomanııanyń kesirinen qo­ǵamǵa taýqymet tartqyzǵan taǵy bir kesel – sýısıdtiń de statıstıkasy óse bastaǵan-dy. Elimiz osy bir derttiń jahandyq tiziminiń kósh basyndaǵylardy ókshelep keledi. Álemdik reıtıng jarııalanatyn StatRanker.org saıtynyń bıylǵy 11 qańtardaǵy málimetine súıen­sek, elimiz bul tizimde 19-orynda tur.

Osylaısha, Ádiletti Qazaqstan qaǵıdattary men qundylyq­ta­ryn ornyqtyrýǵa baǵyttalǵan Pre­­zıdent bastamalaryn naqty júze­ge asyrýdyń «Zań jáne tártip» qaǵı­dasy aıasynda Zańsyz oıyn bıznesi men lýdomanııaǵa qarsy is-qımyl jónindegi 2024–2026 jyldarǵa ar­nalǵan keshendi jospar iske asyrylyp, osy baǵyttaǵy zańnamanyń kúsheıtilýiniń arqasynda kóptegen shekteý sharalary engizildi. Qumar oıyndarǵa qunyqqandardyń qatary sıredi. Ásirese áskerılerdi osy jaqqa tartyp turatyn barlyq jol jabyldy. Bul úlken strategııalyq sheshim boldy.