Eki kúnge sozylǵan jıynǵa elimizdegi joǵary oqý oryndarynyń rektorlary men prorektorlary, memlekettik organdardyń ókilderi qatysty.
Forýmnyń alǵashqy kúni «QAA», «ASIIN» jáne «IAAR» halyqaralyq akkredıtteý agenttik sarapshylarynyń qatysýymen sheberlik saǵattary uıymdastyryldy. Onda qatysýshylar ýnıversıtetterdi halyqaralyq akkredıtteýge daıyndaý, capa mádenıetin qalyptastyrý jáne bilim qyzmetiniń eksportyn damytý máselelerin talqylady.
Al ekinshi kúni – doktoranttardyń zertteý qyzmeti nátıjesiniń sapasyn baǵalaýdyń jańa tásili men joǵary jáne joǵary oqý ornynan keıingi bilim berý uıymdarynda sapany qamtamasyz etýdiń ishki júıelerin damytý sóz boldy. Sonymen qatar qatysýshylar taqyryptyq sessııalarǵa bólinip, joǵary jáne joǵary oqý ornynan keıingi bilim salasyn retteý jáne ruqsat berý saıasatyn saraptady.
Forýmnyń basty oqıǵasy – joǵary bilim men ǵylymnyń sapasyn qamtamasyz etý júıesiniń qazirgi jaǵdaıy men damý keleshegine, sondaı-aq zamanaýı tehnologııalyq jáne normatıvtik ózgeristerdiń joǵary jáne joǵary oqý ornynan keıingi bilim salasyna arnalǵan plenarlyq otyrys boldy. Buǵan Ǵylym jáne joǵary bilim mınıstri Saıasat Nurbek qatysyp, otandyq joǵary bilimniń sapasy men damýy jaıynda salmaqty sóz órbitti.
Jıyn barysynda joǵary bilimdegi sapany qamtamasyz etý boıynsha álemdegi jetekshi organnyń biri – «Quality Assurance Agency for Higher Education» agenttiginiń (QAA) ókili Nazarbayev University-diń Joǵary bilim mektebine QAA-diń halyqaralyq baǵdarlamasyn akkredıtteý sertıfıkatyn tabys etti. Bul Joǵary bilim mektebiniń úsh akademııalyq baǵdarlamanyń sátti ótýi nátıjesinde berildi. Dálirek aıtqanda, birinshi – kóptildi bilim boıynsha magıstrlik baǵdarlama (MA), ekinshi – bilimdegi kóshbasshylyǵy boıynsha magıstrlik baǵdarlama (MSc), úshinshisi bilim salasy boıynsha PhD halyqaralyq talaptarǵa saı dep tanyldy.
Osy rette NU prezıdenti, professor Vakar Ahmad atalǵan joǵary oqý orny bilim sapasyn qamtamasyz etý mádenıetin damytýda qozǵaýshy kúsh retindegi rólin berik ustanatynyn jetkizdi.
«Akademııalyq adaldyq pen akademııalyq erkindik ýnıversıtet maqsatynyń negizi ózegi bolyp qalady. Sondaı-aq jasandy ıntellekt pen sıfrlyq tehnologııanyń mańyzy aldaǵy ýaqytta arta túsedi. Al ǵylymı zertteýler oqý úderisimen burynǵydan da tyǵyz yqpaldasady. «Times Higher Education» (THE) 2025 jahandyq reıtınginde «Bilim» baǵyty boıynsha álemniń úzdik 200 joǵary oqý orny qataryna engen NU Joǵary bilim mektebi elimizdegi ýnıversıtettermen birlesip, bilim men ǵylymı zertteýlerdiń sapa standartyn kóterý baǵytynda jumys istep keledi», dedi ol.
Jıyn qorytyndysynda qatysýshylar sapany qamtamasyz etý tetigin odan ári damytyp, halyqaralyq yntymaqtastyqty keńeıtip, joǵary jáne joǵary oqý ornynan keıingi bilimniń ulttyq júıesine úzdik sheteldik tájirıbelerdi engizý qajettigin aıtty.
