Foto: Gov.kz
Jańa Salyq kodeksinde ózin-ózi jumyspen qamtyǵandar úshin, ońaılatylǵan deklarasııa negizindegi rejım, sharýa jáne fermer qojalyqtary úshin úsh arnaýly salyq rejımi engizilgen.
«Jańa Salyq kodeksi aıasynda arnaýly salyq rejımderiniń sany qysqartyldy, ıaǵnı olar úshke deıin ońtaılandyryldy. Buǵan deıin olardyń sany jeti bolǵan. Qazirgi tańda úsh arnaýly salyq rejımi qaldy. Birinshisi – ońaılatylǵan deklarasııa negizindegi arnaýly salyq rejımi. Ekinshisi – ózin-ózi jumyspen qamtyǵandarǵa arnalǵan arnaýly salyq rejımi. Úshinshisi – sharýa jáne fermer qojalyqtaryna arnalǵan arnaýly salyq rejımi», dedi Memlekettik kirister komıtetiniń Arnaýly salyq rejımderin ákimshilendirý basqarmasynyń basshysy Erqanat Shyńbergen.
Kásipkerler neni bilýi tıis:
Ońaılatylǵan deklarasııa negizindegi arnaıy salyq rejımi (ASR)
Osy rejımdi qoldanýdy josparlap otyrǵan salyq tóleýshiler 2026 jylǵy 1 naýryzǵa deıin qoldanylatyn salyq salý rejımi týraly habarlama usynýy qajet.
Eger kórsetilgen merzimde habarlama usynylmasa, salyq tóleýshiler 2026 jylǵy 1 qańtardan bastap avtomatty túrde jalpyǵa birdeı belgilengen salyq salý tártibine aýystyrylady.
Habarlamany qalaı jiberý kerek:
Salyq tóleýshiniń kabıneti arqyly (AJ SÁIJ júıesinde «Qujattardy tapsyrý» – «Qoldanylatyn salyq salý rejımi týraly habarlama» bólimi).
«E-Salyq Business» arnaıy mobıldi qosymshasy arqyly («Qyzmet» – «JK salyq salý rejımin ózgertý» bólimi).
Qaǵaz nusqada ornalasqan jeri boıynsha «Memlekettik kredıttik bıýro» AQ (MKB) arqyly;
Bankterdiń mobıldi qosymshalary arqyly (qazir bul servıs Kaspi Bank qosymshasynda «Memlekettik qyzmetter» – «JK rekvızıtteri men salyq rejımin ózgertý» bóliminde iske asyrylǵan) berýge bolady.
О́zin-ózi jumyspen qamtyǵandarǵa arnalǵan arnaýly salyq rejımine kóshý
2026 jylǵy 1 naýryzdan bastap salyq organdary 2025 jyly patent negizindegi ASR nemese arnaıy mobıldi qosymshasy arqyly ASR qoldanǵan salyq tóleýshilerdi jeke kásipker retinde esepten avtomatty túrde shyǵarady. Bul rette salyq tóleýshiniń esepten shyǵý týraly ótinishti óz betinshe berý quqyǵy saqtalady.
Eger salyq tóleýshi qoldanylatyn salyq salý rejımi týraly habarlama tapsyryp, ózge rejımdi tańdaǵan jaǵdaıda, esepten shyǵarylmaıdy. Bul rette ózin-ózi jumyspen qamtyǵandarǵa arnalǵan ASR qoldana bastalǵan kúni retinde «E-Salyq Business» mobıldi qosymshasynda alǵashqy chek engizilgen kún esepke alynady.
Sharýa jáne fermer qojalyqtary (ShFQ) úshin arnaýly salyq rejımine kóshý
Atalǵan rejımge kóshý 2026 jylǵy 1 naýryzǵa deıin salyq organdary arqyly avtomatty túrde júzege asyrylady. Bul sanatqa jatatyn kásipkerlerden habarlama tapsyrý talap etilmeıdi.
