«Osy kezeńde prezıdent pen vıse-prezıdenttiń bir maqsatqa jumylyp, úılesimdi áreket ete alatynyn kórsettik. Men Ilııana Iotova Bolgarııanyń laıyqty basshysy bolatynyna senimdimin», dedi Rýmen Radev.
Ol óz prezıdenttigi tusynda el eki iri qoǵamdyq tolqyndy – 2020 jáne 2025 jyldardaǵy jappaı narazylyqtardy bastan ótkergenin eske saldy. Osy aralyqta ýaqytsha úkimet jeti márte qurylǵan.
«Búgin men sizderge Bolgarııa prezıdenti retinde sońǵy ret ún qatyp turmyn. Osy toǵyz jylda el eýropalyq ıntegrasııa úderisin aıaqtady. Biz búginde Shengen aımaǵy men eýroaımaqtyń múshesimiz. Bul – 1990-jyldardyń sońynda belgilegen strategııalyq meje», dedi ol.
Memleket basshysy eldegi saıası túıtkilderdiń túp-tórkinin «syrttaı demokratııaǵa uqsaıtyn, biraq shyn máninde olıgarhııalyq tetiktermen jumys isteıtin» basqarýdyń qasań modelinen kóretinin aıtty.
«Bolgarııadaǵy saıasat memlekettik ınstıtýttardan tys damyp otyr. Qýyrshaqtar kamera aldynda ashyq kórinip, Ulttyq jınalysqa nusqaý beredi. Olar premer-mınıstrdiń kózinshe úkimet atynan sóıleıdi, partııalardy, bankterdi, kásiporyndar men buqaralyq aqparat quraldaryn ıemdenedi. Bılikti saıası qarsylastarǵa qarsy taıaq retinde paıdalanady», dep málimdedi prezıdent.
Rýmen Radev 2025 jyldyń kúzinde narazylyqqa shyqqan jastardyń áreketi ózine erekshe jiger bergenin atap ótti.
«Bul – halqymyzdyń psıhologııasyndaǵy betburys. Endi beıjaılyqqa, jeke bas qamyn ǵana kúıtteýge núkte qoıatyn ýaqyt keldi. Bizdi ótkenge baılap turǵan alaýyzdyqty artta qaldyrý qajet. Alǵa bastar joldy alańdaǵy birlik kórsetti», dedi ol.
Reuters agenttiginiń habarlaýynsha, prezıdenttiń bul sheshimi kútilgen qadam sanalady. Bolgarııa aldaǵy aılarda ótetin kezekten tys parlament saılaýyna daıyndalyp jatyr, bul sońǵy tórt jyldaǵy segizinshi naýqan bolmaq. Aqparat kózderiniń dereginshe, Rýmen Radev aldaǵy saılaýǵa qatysý úshin jeke saıası partııa qurýy yqtımal.
2025 jyldyń qarasha aıynyń sońynan beri Bolgarııa aýmaǵynda jappaı narazylyqtar ótti. Sherýshiler salyq saıasatyna, áleýmettik aýdarymdardyń ósýine qarsy shyǵyp, bıliktiń aýysýyn jáne sybaılas jemqorlyqpen kúresti kúsheıtýdi talap etti. 11 jeltoqsanda el premer-mınıstri Rosen Jelıazkov úkimetiniń otstavkaǵa ketetinin resmı túrde jarııalaǵan edi.
