Foto: Ashyq derekkóz
«Eldegi avtokólik joldaryn halyqaralyq standarttarǵa saı jańǵyrtý – aıryqsha mańyzdy mindet. Bul, birinshiden, Qazaqstannyń batys pen shyǵys arasyndaǵy tranzıt dálizi retindegi rólin arttyra túsedi. Ekinshiden, oblystar arasyndaǵy kólik baılanysyn barynsha jaqsartady. Jaqynda Qyzylorda – Jezqazǵan jolynyń Qyzylordaǵa tıesili bóligi salynyp bitti. Jyl sońyna deıin Ulytaý oblysyndaǵy bóliginde kólik qozǵalysy tolyq ashylady. Joldyń jalpy uzyndyǵy – shamamen 400 shaqyrym», dedi Qasym-Jomart Toqaev.
Memleket basshysynyń aıtýynsha, bıyl Qazaqstanda buryn-sońdy bolmaǵan aýqymdy ınfraqurylymdyq jobalar bastalady.
«Batys Qytaı – Batys Eýropa» – Qazaqstandaǵy eń negizgi joldyń biri. Alaıda, onyń Qyzylorda – Aqtóbe arasyndaǵy bóligi – tar, kólik apattary jıi bolyp jatady. Men osyǵan deıin bul joldy keńeıtý týraly tapsyrma berdim. Bıyl osy baǵytta tórt jolaqty jańa kúre joldyń qurylysy bastalady. Qazirgi joldyń kóbi oblystardyń ishki joly bolyp qala beredi. Sondaı-aq men byltyrǵy Joldaýymda «Beıneý – Sekseýil» jolynyń qurylysyn tezdetýdi tapsyrǵanymdy bilesizder. Ondaǵy jumystar da bıyl bastalmaq. Joba júzege asqan soń «Orta dálizdiń» qashyqtyǵy 900 shaqyrymǵa qysqarady, ıaǵnı, Aqtaý, Quryq porttaryna týra jol ashylady. Qaraǵandy – Jezqazǵan baǵytyndaǵy jol talaı jyldan beri tozyp tur. Bıyl eski joldyń qaptalyna eki jolaqty jańa jol salýǵa kirisemiz Keıin eski joldy da jańǵyrtyp, tórt jolaq etý josparlanýda», dedi Prezıdent.
Budan bólek, Memleket basshysy osy jyly «Saryaǵash aınalma jolynyń» qurylysy qolǵa alynatynyn aıtty.
«Barlyq jumystyń sapaly ári ýaqytyly oryndalýyn tikeleı baqylaýda ustaıtyn bolamyn. Sebebi, bul jobalar Qazaqstannyń halyqaralyq kólik-logıstıka ortalyǵy retindegi áleýetin meılinshe nyǵaıta túsedi», dedi Qasym-Jomart Toqaev.
Memleket basshysy jańa Parlamenttiń ataýyn «Quryltaı» dep ataýdy usyndy
Sonymen qatar Memleket basshysy kisi qolynan qaza tapqan Nuraıdyń basynda bolǵan jaǵdaıǵa da asa mán berdi. Buǵan deıin Qasym-Jomart Toqaev Aral teńizi máselesine qatysty pikir bildirip, ony saqtaý búkil adamzat úshin ózekti mindet ekenin aıtqan bolatyn.
