Bul sheshim premer-mınıstr Kım Mın Soktyń tóraǵalyǵymen ótken Terrorızmge qarsy ulttyq komıtettiń otyrysynyń qorytyndysynda jarııalandy.
Oqıǵa Lı Chje Mıonniń jumys sapary kezinde bolǵan. Ol sol kezde oppozısııadaǵy Demokratııalyq partııany basqarǵan edi. Pýsan portty qalasynyń mańyndaǵy Kadokto jańa áýejaıynyń qurylys alańyna barǵan kezde ózin jaqtaýshy retinde tanystyrǵan er adam saıasatkerge jaqyndap, moıyn tusynan pyshaq suqqan. Qylmysta qoldanylǵan qarý aldyn ala ózgertilgeni anyqtalǵan.
Lı Chje Mıon aýyr jaraqat aldy. Ol shuǵyl aýrýhanaǵa jetkizilip, keıinnen qoǵamdyq qyzmetine qaıta oraldy. Shabýyl jasaǵan shamamen 60 jastaǵy er adam oqıǵa ornynda ustaldy. 2025 jylǵy aqpanda Ońtústik Koreıanyń Joǵarǵy soty ony 15 jylǵa bas bostandyǵynan aıyrý týraly úkimdi kúshinde qaldyrdy.
Oqıǵadan keıin Demokratııalyq partııa ókilderi shabýyldyń aýyrlyǵyn tómendetýge tyrysý áreketteri bolǵanyn birneshe ret málimdegen. Atap aıtqanda, oppozısııa Ulttyq barlaý qyzmetin (NIS) aıyptap, burynǵy prezıdent Iýn Sok Ioldiń bıligi kezinde (keıin ol ımpıchmentke ushyraǵan) bul organ aıǵaqtardy tıisti deńgeıde tirkemedi jáne shabýyldy terrorıstik akt retinde taný bastamasyn kótermedi dep kórsetken.
Ońtústik Koreıanyń eks-prezıdentine sot úkimi shyqty
Premer-mınıstr keńsesinde istiń jańa quqyqtyq mártebesine baılanysty qosymsha tergeý júrgiziletini habarlandy.
