Bul óz nátıjesin berdi. Sońǵy eki jylda ERG-diń «Temir» dıvızıonynan basqa barlyq kásiporyndary tarıhı eń joǵary óndiristik kórsetkishtermen jumys istep keledi. ERG basshysy «Qazhrom» TUK» AQ-nyń Aqtóbe ferroqorytpa zaýytynda óndiristiń ekologııalyq tıimdiligin arttyrýǵa baǵyttalǵan negizgi jobalardyń biri – biregeı kádege jaratý stansııasynyń qurylys qarqynyn baǵalady. Bul joba kompanııanyń ekologııalyq strategııasynyń zańdy jalǵasy. Qazir ferroqorytpa gazyn kádege jaratýdyń eń tıimdi sheshimderiniń biri sanalady. Atalǵan gaz 80 MVt elektr energııasyn óndirý úshin paıdalanylyp, kásiporyndy ekologııalyq taza menshikti energııa kózimen qamtamasyz etedi.
Aqtóbe ferroqorytpa zaýytynyń jańartylǵan dıspetcherlik ortalyǵynda Shýhrat Ibragımov 4-balqytý sehynyń sıfrlyq egiziniń múmkindikterimen tanysty. Jańa júıede tehnologııalyq prosesterdi naqty ýaqyt rejıminde kórýge bolady. Bul tehnologtarǵa bir monıtor arqyly búkil prosesti baqylaýǵa jáne qysqa ýaqyt ishinde vırtýaldy aralaý júrgizýge múmkindik beredi. Sońǵy bes jylda ERG-diń sıfrlandyrý men jasandy ıntellekti engizýge quıylǵan ınvestısııasy – 117 mln AQSh dollary mejesinde.
Aqtóbe ferroqorytpa zaýyty, Dóń taý-ken baıytý kombınaty jáne Aqtóbe jylý elektr stansııasynyń eńbek ujymdarymen kezdesýde ERG Dırektorlar keńesiniń tóraǵasy 2025 jylǵy jumystary úshin alǵys aıtyp, kompanııanyń aldaǵy josparlarymen bólisti.
– Hrom dıvızıony ótken jyly birqatar syn-qaterlerge tap boldy. Biz «Bolashaq» kenishindegi eń kúrdeli máselelerdi sheshtik, ǵylymdardy iske tarttyq jáne búginde kenish qalypty rejımde jumys istep tur. ERG Green biregeı flotasııa ýchaskesin iske qostyq jáne qazir qaldyqtardan hrom óndirip jatyrmyz. Bıyl jáne aldaǵy jyldary ERG damý qarqynyn báseńdetpeı, negizgi ınvestısııalyq jáne áleýmettik jobalardy iske asyrý baǵytyn saqtaıdy, – dedi Shýhrat Ibragımov.
Júzdesýde qaýipsizdik máselesine erekshe nazar aýdaryldy. Top úshin qaýipsizdik – eń negizgi basymdyq. Tek qaýipsizdik qamtamasyz etilgen jaǵdaıda ǵana óndiristik jetistikter týraly aıtýǵa bolady, - dep atap ótti Shýhrat Ibragımov.
Kezdesý barysynda álemdik taý-ken metallýrgııa kompanııalary, sonyń ishinde ERG kásiporyndary tap bolǵan san alýan daǵdarystan bastap, ónimniń ózindik qunyn tómendetý sharalary men áleýmettik baǵdarlamalardy damytýǵa deıingi keń aýqymdy máseleler talqylandy.
Kezdesýdiń jaǵymdy qorytyndysy retinde Aqtóbe ferroqorytpa zaýyty №2 balqytý sehynyń kúıdirý jáne áktas ýchaskesiniń bastyǵy Turmanbaı Baıtaqov ERG-diń «О́ndiristegi eseli eńbegi úshin» korporatıvtik nagradasymen marapattaldy. Ol zaýyttaǵy eńbek jolynda naǵyz kásibı shyńdalý mektebinen ótti.
Qazaqstannyń temir keni alyby – Sokolov-Sarybaı ken-baıytý óndiristik birlestiginde ERG Dırektorlar keńesiniń tóraǵasy kendi daıyndaý jáne baıytý sehynyń baıytý ýchaskesine bardy. Jalǵasyp jatqan daǵdarys daıyn ónimdi tutynýshylarǵa ótkizý kólemine keri áser etti. SSKО́B sońǵy tórt jyl boıy óz qýatynyń tek 65%-ynda ǵana jumys istep keledi. Soǵan qaramastan, kásiporynda jańǵyrtý jumystary belsendi júrgizilýde. Fabrıkanyń qaıta óńdeý kezeńi qarqyndy túrde jańartylýda. Barlyq ózgerister temir keni konsentraty men shekemtastardyń sapalyq kórsetkishterin arttyrýǵa baǵyttalǵan.
Aýqymdy ózgerister eki strategııalyq jobany iske asyrýǵa daıyndyqtyń mańyzdy kezeńi sanalady: jańa kúıdirý mashınasynyń qurylysy jáne ystyq brıkettelgen temir (HBI) óndiretin zaýyt salý. HBI zaýytynyń jobalyq qujattamasy memlekettik vedomstvodan tys saraptamadan ótti. Endi jumys qujattamasyn ázirleýge jáne qurylys-montaj jumystaryna kirisýge bolady. Bolashaq HBI zaýyty Ortalyq Azııadaǵy jańa býyndaǵy «jasyl» metallýrgııanyń eń iri nysandarynyń birine aınalady. Metal deńgeıi keminde 93% jáne temir quramy 90%-dan joǵary ónim shyǵarý Qazaqstanǵa jahandyq bolat naryǵyna básekege qabiletti jańa ónimmen shyǵýǵa múmkindik beredi. О́ndiristik qýaty – jylyna 2 mln tonna, ınvestısııa kólemi – 650 mlrd teńgeden astam. 2029 jyly kásiporyndy iske qosý josparlanǵan. 1 000-nan astam jumys orny ashylady.
ERG-diń osy óńirdegi kásiporyndary – SSKО́B, Qashar keni, ERG Service jáne «TransRemVagon» (TransKom) qyzmetkerlerimen ótken kezdesýde Shýhrat Ibragımov árbir qyzmetkerdiń kásibıligin jáne óz isine jaýapkershilikpen qaraıtynyn atap ótip, eńbekti qorǵaý talaptaryn saqtaýdyń mańyzdylyǵyna erekshe toqtaldy.
– Ekonomıkalyq daǵdarystyń sozylyp ketkenine qaramastan, ERG kompanııasy mańyzdy damý strategııasyn iske asyrýdy jalǵastyryp keledi. Biz mindetti túrde alǵa jyljýymyz kerek, – dep atap ótti Shýhrat Ibragımov. – Biz strategııalyq mańyzy bar jobalardy iske asyrýdy jalǵastyramyz. Solardyń biri – ystyq brıkettelgen temir (YBT) zaýytynyń qurylysy. Búgingi tańda turaqty óndiris, ónim sapasyn arttyrý jáne onyń ózindik qunyn tómendetý burynǵydan da mańyzdy. Iske múddeli bolý qajet. Osy arqyly biz jańa naryqtarǵa shyǵyp, jańa tutynýshylarǵa tartymdy bola alamyz.
Damý jobalarymen qatar, kompanııa burynǵydaı áleýmettik baǵdarlamalar men mindettemelerge de erekshe kóńil bólip keledi. Olar tolyq kólemde saqtalýda. Buǵan Shýhrat Ibragımov barǵan Pavlodar oblysyndaǵy birqatar nysandar aıqyn dálel bola alady.
Pavlodar qalasynda ERG Dırektorlar keńesiniń tóraǵasy Jańa jyl merekesi qarsańynda jáne «Jumysshy mamandyqtar jylynyń» qorytyndysy aıasynda qalanyń Ýsolskıı shaǵyn aýdanyndaǵy zamanaýı turǵyn úı kesheninen páter kiltin alǵan Top kásiporyndarynyń qyzmetkerlerimen kezdesti. «Otbasy banki» AQ-men birlesken turǵyn úı baǵdarlamasy aıasynda 135 eýrazııalyq bir kúnde úıli boldy. Sońǵy úsh jylda ERG qyzmetkerlerge arnalǵan turǵyn úı baǵdarlamasyn iske asyrýǵa 7 mlrd teńgeden astam qarjy bólgen.
Shýhrat Ibragımov jańa qonystanýshylardyń biri – kópbalaly Áset Bekenovtiń shańyraǵyna arnaıy bardy. Árıne «qonys qutty bolsyn!» aıtqanda, qur qol barmady.Otbasyna teledıdar, balalarǵa oıshyqtar ala kelgen. Pavlodar alıýmınıı zaýytynyń ortalyqtandyrylǵan jóndeý sehynda 5-razrıadty gaz kesýshi bolyp jumys isteıtin, tórt balanyń ákesi Áset Bekenov osydan eki jyl buryn páter kezegine turǵan. Qysqa merzimde jeńildetilgen shartpen páter alǵandardyń biri. Osy múmkindikti paıdalanyp, ol Shýhrat Ibragımovten kishi uly Nurasyl Qanjarbektiń tusaýyn kesýdi ótindi.
– Men bul kásiporynda 2015 jyldan beri jumys istep kelemin. Buǵan deıin páter jaldap turdym. О́z baspanamyzdyń kiltin alǵan kezde qýanyshymyzda shek bolmady. Balalar bólmelerin ózderi tańdap, qatty qýandy. Al kishi ulymyz Nurasylǵa tusaýkeser rásimin Shýhrat Ibragımovtiń ózi ótkizegn bizge erekshe qýanysh. Jalpy, zaýytqa jumysqa turǵanyma bir sát te ókingen emespin. Erteńgi kúnimizge senimdimin, balalarymnyń bolashaǵyna alańdamaımyn, – dedi Áset Bekenov.
Aqsý ferroqorytpa zaýytynda ERG Dırektorlar keńesiniń tóraǵasy qyzmetkerlerge arnalǵan MERGEN arnaıy dúkeniniń assortımentimen tanysty. Munda qazaqstandyq óndiristiń birqatar ónimderi kádimgi dúkenderge qaraǵanda tómen baǵamen usynylady. Qazirgi tańda MERGEN jelisinde ERG-niń týǵan qalalarynda 17 dúken jumys isteıdi. Qańtar aıynda osy qaǵıdamen jumys isteıtin MERGEN dárihanalary da ashyldy.
Aqsý ferroqorytpa zaýytynda kompanııa basshysy ERG Kásibı biliktilikti taný ortalyǵynda bardy. Bul – Qazaqstannyń taý-ken metallýrgııa keshenindegi alǵashqy osyndaı ortalyq. Ol Qazaqstan Respýblıkasy Ulttyq kásipkerler palatasynda akkredıttelgen jáne QR Eńbek jáne halyqty áleýmettik qorǵaý mınıstrliginiń qoldaýymen Ulttyq biliktilik júıesiniń talaptaryna saı qurylǵan.
Ortalyqtyń negizgi mindeti – metallýrgııa jáne taý-ken salasyndaǵy negizgi jumysshy mamandyqtary boıynsha qyzmetkerler men úmitkerlerdiń kásibı biliktiligin resmı rastaý. Alǵashqy kezeńde ERG 12 negizgi mamandyq boıynsha baǵalaý júrgizedi: stropalshık, ferroqorytpa balqytýshysy, metallýrgııalyq óndiristegi kran mashınısi, elektrgazben dánekerleýshi, qolmen doǵalyq dánekerleýshi, elektrdánekerleýshi, jarýshy, uńǵylaýshy, ekskavator jáne júk tıeý-kólik mashınasynyń mashınısi, aýyr júk kóliginiń júrgizýshisi. Biliktilikti taný rásimi zańnama talaptaryna sáıkes erikti nemese mindetti túrde júrgiziledi. Ortalyq tek ERG qyzmetkerleri ǵana emes, basqa kásiporyndardyń mamandary, stýdentter, túlekter men merdigerlerge árdaıym ashyq. Aldaǵy ýaqytta ERG mamandyqtar tizimin keńeıtýdi josparlap otyr. Mundaı ortalyqtar Rýdnyı men Hromtaýda da ashyldy.
Osy Aqsýda Qazaqstan energetıkasy úshin asa mańyzdy eki bastama qatar iske asyrylyp jatyr – №7 energoblokty qaıta jańǵyrtý jáne Aqsý elektr stansııasynda gıbrıdti súzgilerdi engizý.
№7 energoblokty qaıta jańǵyrtýǵa ERG shamamen 280 mln AQSh dollary kóleminde ınvestısııa salǵan. Joba aıaqtalǵannan keıin Aqsý ES jylyna qosymsha 1 634 mln kVt·saǵ elektr energııasyn óndiredi jáne naryqty retteýge belsendi qatysady. Bul Toptyń qajettiligin qamtamasyz etýge ári naryq úshin manevrlik qýat qalyptastyrýǵa múmkindik beredi.
Ekologııalyq strategııa aıasyndaǵy ekinshi joba – Ortalyq Azııada alǵash ret osyndaı tazalaý deńgeıine ıe ınnovasııalyq súzgilerdi energetıkalyq kásiporyndarda engizý. №4 jáne №7 energobloktarda qatty shyǵaryndylardy álemdik eń ozyq standarttar deńgeıine deıin tómendetetin úsh gıbrıdti súzgi ornatylady. Bul jobaǵa ERG 13 mlrd teńgeden astam ınvestısııa salýda.
Memleket basshysy Joldaýynda kómir energetıkasyn taza tehnologııalardy qoldana otyryp damytýǵa erekshe kóńil bólý qajet ekenin atap ótti. Aqsý elektr stansııasyndaǵy joba osy mindetke tolyq saı. Bul – kompanııa aksıonerleri bekitken ERG Ekologııalyq strategııasyn iske asyrýdaǵy júıeli jumystyń jalǵasy. Sonyń nátıjesinde qatty bólshekterdiń shyǵaryndylary 15%-ǵa tómendedi. ERG 2030 jylǵa deıingi Ekostrategııa jobalaryna 282 mlrd teńge ınvestısııa salýdy josparlap otyr. Strategııa taý-ken óndirisi, metallýrgııa jáne energetıka sııaqty negizgi baǵyttardyń barlyǵyn qamtıdy.
2025 jyly Pavlodar alıýmınıı zaýytynda ERG el úshin jańa – gallıı óndirisin iske asyra bastady. Qazaqstan bul ónimdi óndirý kólemi boıynsha álemdegi ekinshi el atanady. Memleket basshysynyń Japonııaǵa memlekettik sapary aıasynda ERG gallıı jetkizý boıynsha Mitsubishi Corporation RtM Japan Ltd kompanııalarymen uzaq merzimdi kelisimshart jasasty.
«Qazaqstan alıýmınııi» AQ Pavlodar alıýmınıı zaýytynyń óndiristik eritindilerinen gallıı óndirýdiń ońtaıly tehnologııasy – ERG Research and Development kompanııasynyń óz ázirlemesi. Bul tehnologııa glınozemniń sapasyn arttyrýǵa, onyń shyǵynyn azaıtýǵa jáne gallıı mólsheri óte tómen eritindilerden strategııalyq mańyzy bar joǵary tazalyqtaǵy metaldy alýǵa múmkindik beredi. Gallıı óndirý ýchaskesiniń qurylysyna quıylatyn ınvestısııa kólemi – 12,5 mlrd teńgeden asady. Jańa óndiristiń qýaty – jylyna 15 tonna gallıı. Alǵashqy ónimdi 2026 jyldyń úshinshi toqsanynda alý josparlanǵan.
Joǵaryda atalǵan jobalardyń bári syrtqy syn-qaterlerge qaramastan, kompanııanyń Qazaqstandaǵy ERG kásiporyndaryn damytýǵa ınvestısııa kólemin arttyrýdy jalǵastyryp otyrǵanyn jáne onyń strategııasy men uzaq merzimdi áleýetine degen senimnyń aıqyn dáleli.
