Mýzeı meńgerýshisi Vera Edigenova óńirdiń ken ıgerý dáýiriniń bastaýynda akademık Qanysh Sátbaev turǵanyn aıtady.
«1945 jyly Qanysh Imantaıulynyń bastamasymen Torǵaı ústirtinde aýqymdy izdestirý, barlaý jumystary qolǵa alynady. Sonymen birge Qostanaı oblysyndaǵy Aıat temir ken ornyna barlaý jumysy bastaldy. Sol jyldary Aıat ken ornyn zertteý jóninde erekshe úkimettik komıssııa qurylady. Qanysh Sátbaev atalǵan komıssııanyń belsendi múshesi boldy. Osy jyldary júrgizilgen geologııalyq barlaý, zertteý jumystarynyń nátıjesinde Aıat, Lısakov oolıt ken oryndary, temir qoryna baı Sarybaı, Sokolov, Qashar, Qorjynkól tárizdi kóptegen magnetıtti ken oryndary ashyldy. Bul ken oryndarynyń negizinde kóptegen kenish, ken baıytý kásiporny salyndy. Sonyń biri – qazir Rýdnyı qalasynda jumys istep turǵan Sokolov-Sarybaı ken baıytý kombınaty», deıdi mýzeı meńgerýshisi.
Vera Edigenovanyń aıtýynsha, kezinde ǵalymnyń jetekshiligimen Torǵaı ústirti qoınaýyndaǵy qońyr kómir, boksıt, asbest, túrli tústi, sırek kezdesetin baǵaly metalǵa baı qazba baılyq oryndaryna barlaý jumystary júrgizilgen.
Qostanaı oblysy
