Sýret JI kómegimen jasaldy
Jańa júıe OpenAI platformasynda qoldanýshynyń akkaýnty qashan ashylǵanyn, qanshalyqty jıi paıdalanatynyn jáne qandaı suraqtar qoıatynyn qarap, onyń 18 jasqa tolǵan-tolmaǵanyn shamalap anyqtaıdy. Eger júıe paıdalanýshyny jasóspirim dep tapsa, ChatGPT avtomatty túrde qosymsha qaýipsizdik rejımine kóshedi. Bul rejımde zorlyq-zombylyq, seksýaldyq mazmun, ózine zııan keltirý jaıly aqparat jáne qaýipti áreketke ıtermeleıtin onlaın chellendjder kórsetilmeıdi.
Kompanııa ókilderiniń aıtýynsha, jasty anyqtaıtyn bul júıe balalardyń damý erekshelikterin zerttegen ǵylymı eńbekter men sarapshylardyń tujyrymdaryna súıenip jasalǵan. Soǵan qaramastan, jasóspirimder ChatGPT-di sabaq oqýyna, shyǵarmashylyq jumysqa jáne anyqtamalyq aqparat izdeýge burynǵydaı paıdalana beredi.
Bul jańartý ınternettegi balalardyń qaýipsizdigine memleketter kóbirek kóńil bóle bastaǵan kezeńde jarııalandy. Qazir Eýroodaq elderinde 16 jasqa deıingi balalarǵa áleýmettik jelilerdi shekteý máselesi talqylanyp jatyr. Al Avstralııada mundaı tyıym kúshine engen, biraq ol talap ChatGPT-ge tikeleı qatysty emes.
Taqyryptyń ózektiligin arttyrǵan taǵy bir jaǵdaı – Kalıfornııada OpenAI men onyń bas dırektory Sem Oltmanǵa qarsy sot isiniń qozǵalýy. 16 jastaǵy jasóspirimniń ata-anasy platforma balasynyń psıhologııalyq jaǵdaıyna keri áser etti dep esepteıdi. Buǵan deıin kompanııa ata-analarǵa arnalǵan baqylaý múmkindikterin engizgen. Onyń ishinde chat-bottyń belgili bir ýaqytta jumys istemeýi jáne áńgime barysynda qaýipti belgiler baıqalsa, eskertý berý fýnksııasy bar.
Eger júıe qoldanýshynyń jasyn qate anyqtasa, ol kámeletke tolǵanyn dáleldeý úshin onlaın selfı jiberip nemese jeke kýáliginiń kóshirmesin júkteı alady. Buǵan deıin Ulybrıtanııada bılik partııasynyń depýtattary da 16 jasqa deıingilerge áleýmettik jelilerdi paıdalanýǵa tyıym salýdy usynǵan. Sıfrlaný kúsheıgen saıyn, álem elderi balalar men jasóspirimderdiń ınternettegi qaýipsizdigin qatań baqylaýǵa kóship jatyr.
Osy úrdis álemniń birneshe elderinde qoldaý tapqan. Aıtalyq Aýstralııada on altyǵa tolmaǵan jetkinshekter áleýmettik jelini paıdalana almaıdy. Jergilikti jurtqa engizgen zańnyń kiltıpandaryn arnaıy jazǵan bolatynbyz.
Bul jańalyq bizdiń elimizde de jańǵyryp jatqany jasyryn emes. Kúni keshe Premer-mınıstrdiń orynbasary – mádenıet jáne aqparat mınıstri Aıda Balaeva Úkimet otyrysynda buqaralyq aqparat quraldary salasyndaǵy zańnamany jetildirý týraly málimdeme jasady. Mınıstrdiń aıtýynsha, 16 jasqa tolmaǵan azamattardyń áleýmettik jelilerde óz betinshe tirkelýine tyıym salýdy kózdeıtin quqyqtyq normalar ázirlendi. Bul erejeler onlaın-platformalar men BAQ týraly zań jobalaryna engizilip, qazirgi tańda qoǵamdyq talqylaýǵa usynylǵan.
