Festıvalde Qazaqstan atynan shamamen 68 ónerpaz óner kórsetti. Olardyń qatarynda maestro Abzal Muhıtdınniń jetekshiligindegi Astana qalasyndaǵy Erkeǵalı Rahmadıev atyndaǵy Memlekettik akademııalyq fılarmonııa, «Gákký» balet bı ansambli, sondaı-aq Ǵazıza Jubanova atyndaǵy Aqtóbe oblystyq fılarmonııasynyń Qazaq kameralyq hory bar. Ár ujym ulttyq mýzykalyq-bı murasyn zamanaýı sahnalyq sheshimdermen ushtastyryp, kórermenge áserli baǵdarlama usyndy.
Is-sharanyń eń aıryqsha tustarynyń biri – Qazaqstan óner ujymdarynyń úndistandyq kórnekti mýzykanttarmen birlesken konserttik qoıylymdary boldy. Atap aıtqanda, álemge tanymal skrıpkashy Doktor L. Sýbramanıam jáne áıgili vokalıst Kavıta Krıshnamýrtımen birge óner kórsetýi eki eldiń mýzykalyq dástúrleri arasyndaǵy úndestikti, ortaq rýhanı qundylyqtardy aıqyn kórsetti. Bul birlesken qoıylymdar ulttyq mektepterdiń ózara yqpaldasýynyń múmkindikterin ashyp, mádenı dıalogtyń jańa qyryn usyndy.
Konsertke Úndistanda turyp jatqan Qazaqstan azamattary, Qazaqstan Respýblıkasynyń Úndistandaǵy elshiliginiń qyzmetkerleri, sondaı-aq úndi joǵary oqý oryndarynda bilim alyp júrgen Qazaqstan stýdentteri qatysty. Kórermen arasynda qalyptasqan birlik pen ulttyq maqtanysh atmosferasy qazaq óneriniń sheteldegi yqpalyn aıqyn sezdirdi.
Atalǵan mádenı joba – qazaq-úndi mádenı dıplomatııasynyń jarqyn úlgisi. Ol halyqtar arasyndaǵy ózara túsinistikti nyǵaıtyp qana qoımaı, Qazaqstannyń halyqaralyq mádenı bedelin arttyrýǵa da eleýli úles qosty. Festıval aıasyndaǵy óner kórsetýler Qazaqstannyń baı mýzykalyq murasyn jahandyq mádenı keńistikke tanytýǵa, shyǵarmashylyq áriptestikti keńeıtýge múmkindik berdi.
Bizdiń ónerpazdardyń gastroldik sapary munymen shektelmeıdi. Aldaǵy kúnderi olar Úndistannyń Kalkýtta, Chennaı jáne Bangalor qalalarynda konserttik baǵdarlamalar usynýdy josparlap otyr. Bul saparlar qazaq óneriniń geografııasyn keńeıtip, mádenı baılanystardy tereńdetýge baǵyttalǵan mańyzdy qadam bolmaq.
