Shilde aıynan bastap elde jańartylǵan Sý kodeksi qoldanysqa engizildi. Qujat tabıǵı resýrstardy anaǵurlym utymdy paıdalanýdy kózdeıdi. Negizgi baǵyttardyń biri – sýdy kóp kólemde tutynatyn nysandardyń qyzmetin retteý. Bul tizimge avtojýý oryndary da endi.
Jańa talaptarǵa sáıkes, olar kezeń-kezeńimen aınalymdy sý júıesine kóshýi qajet. Onyń jumys isteý qaǵıdaty qarapaıym: paıdalanylǵan sý kópsatyly tazalaýdan ótip, qaıta qoldanylady.
«Biz qaladaǵy barlyq avtojýý oryndaryna túgendeý júrgizip, olardyń táýliktik sý tutyný kólemin anyqtadyq jáne aınalymdy sý paıdalaný júıesin engizý jóninde arnaıy nusqamalar berdik. Bul talaptardyń oryndalýy kásipornymyzdyń baqylaýynda bolady», dedi «Semeı sý arnasy» MKK qoǵammen baılanys bóliminiń basshysy Talǵat Madııarov.
Avtojýý oryndarynyń ıeleri sýdy únemdep paıdalaný ıdeıasyn qoldaıtynyn aıtqanymen, mundaı júıeni engizý ońaı emes. Birinshiden, jabdyq qomaqty qarjyny qajet etedi: sapaly qondyrǵynyń eń tómengi quny 1 mıllıon teńgeden bastalady. Júıeniń baǵasy qýatyna jáne súzý túrine baılanysty. Ekinshiden, jabdyqty ornatý úshin ǵımaratty qaıta jóndeý qajet.
«Bul – jabdyqty ornatý shyǵyndary, jabdyqtyń ózin satyp alý, oǵan qosa súzgilerdi aýystyrý. Olar aıyna bir ret emes, birneshe ret aýystyrylady. Al olardyń quny da arzan emes», dedi avtojýý ornynyń ákimshisi Elena Gýreva.
24.kz málimetinshe, Semeı qalasyndaǵy avtojýý oryndarynyń eń tómengi aılyq sý tutyný kólemi – 70 tekshe metr. Al iri avtojýý keshenderi aıyna 250 tekshe metrge deıin sý jumsaıdy. «Sý arnasy» qyzmetkerleriniń aıtýynsha, jańa tehnologııalarǵa kóshý sý tutynýdy keminde úshten birine qysqartýǵa múmkindik beredi.
Mundaı jabdyqty ornatý tehnıkalyq daıyndyq pen qosymsha qarjyny talap etedi. Sondyqtan qazirgi tańda kásipkerlerdi memlekettik qoldaý sharalary qarastyrylyp jatyr. Bul qaıtarymsyz granttar berý nemese tómen paıyzben nesıe usyný bolýy múmkin.
