Foto: Pavlodar oblysynyń Ádilet departamenti (arhıv)
2022 jylǵy 1 shildeden bastap iske qosylǵan eOtinish júıesi ótinishterdi qabyldaý, óńdeý jáne oryndalýyn baqylaý úderisterin tolyq avtomattandyrdy. Búginde paıdalanýshylar onlaın rejımde ótinish mártebesin qadaǵalap, memlekettik organdarmen ózara árekettesý tarıhyn kóredi, jaýaptardyń sapasyn baǵalaıdy, oryndalýyna shaǵym joldaıdy, sondaı-aq sotqa aryz bere alady. Munyń bári azamat úshin ashyq ári túsinikti orta qalyptastyrdy.
«Tyńdaıtyn memleket» qaǵıdatyn engizý Memleket basshysynyń 2021 jylǵy 26 qańtarda Úkimettiń keńeıtilgen otyrysynda bergen tapsyrmasynan keıin júıeli sıpat aldy. Sonyń nátıjesinde eOtinish.kz biryńǵaı aqparattyq platformasyn engizý boıynsha aýqymdy jumystar júrgizildi. Al 2020 jylǵy 29 maýsymda qabyldanǵan №350-VI Ákimshilik rásimdik-prosestik kodekstiń kúshine enýi ótinishtermen jumys isteý tásilin túbegeıli jańartty.
«Búginde eOtinish memleket pen halyq arasyndaǵy sıfrlyq ózara is-qımylda mańyzdy ról atqaryp, azamattardyń joǵary senimine ıe bolyp otyr. «UAT» AQ komandasy júıeni odan ári yńǵaıly ári tıimdi etý baǵytynda júıeli túrde damytyp keledi. Qazirgi tańda biz jedel áreket etý men derekterdi taldaýǵa arnalǵan jasandy ıntellekt kómekshilerin engizý jáne jetildirý jumystaryn júrgizip jatyrmyz», dedi UAT AQ basqarma tóraǵasynyń orynbasary Gúlmıra Isabekova.
Biryńǵaı sıfrlyq platformaǵa deıin ótinishter ár vedomstvonyń óz arnalarymen qabyldanyp, tirkeletin. Bul azamattar úshin qolaısyzdyq týǵyzyp, ashyqtyqty tómendetip, vedomstvoaralyq baqylaýdy álsiretetin, eOtinish osy olqylyqtardyń ornyn toltyryp, ótinishterdi bir júıege biriktirdi, oryndaý merzimin naqty baqylaýǵa múmkindik berdi.
Oqı otyryńyz: Parlamenttik reforma boıynsha usynystar eGov jáne e-Otinish arqyly qabyldanady
Statıstıka da júıeniń mańyzyn aıqyn kórsetedi. 2025 jyly platforma arqyly jeke tulǵalardan 4 mıllıonnan astam, zańdy tulǵalardan 1 mıllıonǵa jýyq ótinish kelip tústi. Bul 2024 jylmen salystyrǵanda shamamen 1 mıllıonǵa kóp. Demek, eOtinish azamat pen memlekettiń arasyna kópir bolyp qana qoımaı, sıfrlyq senimniń de berik tetigine aınalyp keledi.
