Ulttyq joba aıasynda boı kótergen bilim ordalarynyń árqaısysy 900 oqýshyǵa eseptelip otyr. Oblys ákiminiń orynbasary Qaırat Nurtaevtyń pikirinshe, osy zamanǵy mektepter jas býynnyń sapaly bilim alýyna múmkindik beredi. О́ıtkeni memlekettiń basty saıasatynyń biri – óskeleń urpaqtyń sanaly, bilikti bolýyna qoldaý kórsetý.
«Jańa mektepter zamanaýı úlgidegi ozyq qural-jabdyqtarmen tolyq qamtyldy. Endi shaǵyn aýdandaǵy balalar qalanyń ortalyǵyndaǵy ózge bilim ordalaryna shapqylamaı, óz úıiniń mańyndaǵy mektepte oqıtyn bolady», dedi Q.Nurtaev.
Qalalyq bilim bóliminiń basshysy Aınagúl Dúısekenovanyń málimetinshe, jańa mektep mektepke deıingi, bastaýysh pen orta bilim berý baǵytynda jumys isteıdi. Oqýshylar úsh qabatty ǵımarattaǵy 25 synypta oqıdy. Sondaı-aq STEM-zerthanalar, robottehnıka men ınklıýzıvti bilim berýge arnalǵan kabınetter, sport zaly, kitaphana, májilis zaly, ashana bar.
Oblys ákiminiń orynbasary Daryn Shamuratovtyń málim etýinshe, bilim ordalaryndaǵy qaýipsizdikke basa kóńil bólinip otyr. Qazir óńirdegi 520 mektepte beınekamera bar. Al Atyraý qalasynda «Nazar» jobasy aıasynda bilim ordalaryna ornatylǵan 2500-ge jýyq kameradaǵy jazbany jedel basqarý ortalyǵynan baqylaýǵa bolady.
«Atyraý qalasynda 2024 jyly «Nazar» jobasy iske qosyldy. Bul – elimizde tek Atyraý qalasynda júzege asyrylǵan biregeı baǵdarlama. Joba tek qaýipsizdikti ǵana emes, sabaq ótý sapasyn da baqylaýǵa múmkindik beredi. Atalǵan joba ádiskerlerdiń jumysyn jeńildetedi. Endi kamera fýnksııasyna jasandy ıntellekt engizilip, qaýipsizdikti kúsheıtý kózdelip otyr», dedi D.Shamuratov.
Ákim orynbasarynyń deregine qaraǵanda, oblystaǵy 495 bilim berý nysany týrnıketpen, 462 mekeme lısenzııalanǵan kúzetpen, al 520 nysan dabyl túımesimen jabdyqtalypty. Sondaı-aq memlekettik balabaqshalardyń kireberisine baılanys qurylǵylary ornatylypty. Al terrorıstik turǵydan osal dep tanylǵan 364 nysan jedel basqarý ortalyǵyna qosylypty.
Atyraý oblysy
