Táýelsiz memleket ári derbes komanda retinde elimiz tuńǵysh ret 1994 jyly Norvegııanyń Lıllehammer qalasynda alaýy tutanǵan HVII qysqy Olımpııa oıyndarynda boı kórsetti. Ashylý rásiminde memlekettik týymyzdy shańǵymen tramplınnen sekirýshi Qaırat Bıekenov ustady. Jarys jolyna 28 jerlesimiz shyqty. Bul dodada bizge úsh júlde buıyrdy. Úsheýin de dańqty shańǵyshy Vladımır Smırnov jeńip aldy. Ol 10 shaqyrymdyq klassıkalyq ádis pen 15 shaqyrymdyq erkin ádispen júrýde kúmis medaldy ıelendi. Jarystyń sońǵy kúni 50 shaqyrymdyq mass-startta otandasymyzǵa teń keler eshkim tabylmady. Sóıtip, Smırnovtyń esimi Táýelsiz elimiz tarıhyndaǵy tuńǵysh Olımpıada chempıony retinde sporttyq shejirege altyn áriptermen jazyldy.
Skandınavııa túbeginde jalaýy jelbiregen jarysta Vladımır Smırnovtyń osy úsh júldesiniń arqasynda elimizdiń quramasy jalpy komandalyq esepte 12-orynǵa taban tiredi. Lıllehammerdegi dodada eń úzdik nátıjege Reseı (11 altyn+8 kúmis+4 qola) qol jetkizdi. Ekinshi, úshinshi oryndarda – Germanııa (10+11+5) men Norvegııa (9+7+8). Ozyq bestikti Italııa (7+5+8) men AQSh (6+5+2) túıindedi.
1998 jylǵy Olımpıadany Japonııanyń Naganosy qabyldady. Shyny kerek, osy sapar barysynda bizde úmitten góri kúdik basym edi. Sebebi ol kezde uzaq jyl boıy qysqy sportymyzdy jalǵyz ózi órge súıregen Vladımır Smırnov shaý tartyp qalǵan edi. Ol asa iri halyqaralyq týrnırlerde júldeli orynǵa birde iligip, birde ilikpeı júrdi. Bul jaǵdaı jankúıerlerdi qatty alańdatty. Alǵashqy kúnderi sol qaýiptiń shyndyqqa aınalyp bara jatqanyn ańǵarǵandaı boldyq. Áıgili shańǵyshy 30 shaqyrymdyq qashyqtyqty on ekinshi bolyp aıaqtady. 10 shaqyrymǵa júgirgende tórtinshi orynnan asa almady. Alaıda V.Smırnovtyń sol qashyqtyqtaǵy kórsetkishi oǵan Gýnderson tásilimen 15 shaqyrymdyq jarysta júldeli orynǵa talasýǵa múmkindik berdi. Sol múmkindigin utymdy paıdalanǵan jerlesimiz márege úshinshi bolyp jetti. Ardager sportshy óziniń sońǵy Olımpıadasynda halqyna qola medaldy tartý etti. Kóp uzamaı konkıshi Lıýdmıla Prokasheva óz jankúıerlerin qýantty. Ol 5000 metr qashyqtyqta úshinshi nátıje kórsetti.
Japonııada elinde qos qolany qorjynǵa salǵan jerlesterimiz jalpy komandalyq saıysty 21-orynmen qorytyndylady. Naganoda Germanııaǵa (12+9+8) teń keler el tabylmady. Norvegııa (10+10+5) men Reseı (9+6+3) nemisterge ájeptáýir qarsylyq kórsetti. Odan keıingi satylarǵa kórshiles qos memleket – Kanada (6+5+4) men AQSh (6+3+4) jaıǵasty.
2002 jyly AQSh-tyń Solt-Leık-Sıtı qalasynda úzdik bestikti Norvegııa (13+5+7), Germanııa (12+16+8), AQSh (10+13+11), Kanada (7+3+7), Reseı (5+4+4) qurady. 2006 jyly Italııanyń Týrın qalasynda Germanııa (11+12+6), AQSh (9+9+7), Aýstrııa (9+7+7), Reseı (8+6+8), Kanadanyń (7+10+7) qarqyny kúshti boldy. Bul jarystarda baǵy janbaǵan elimizdiń sportshylary elge quralaqan oraldy.
2010 jyly Aq Olımpıadanyń alaýy Kanadanyń Vankýver qalasynda tutandy. Baq synaǵan 37 sportshymyzdyń arasynan Elena Hrýstaleva sýyrylyp shyqty. Bıatlonshy qyz 15 shaqyrymdyq jeke saıysta kúmis medaldy ıelendi. Nátıjesinde, jalpy esepte 25-oryndy qanaǵat tuttyq. Úıeńki japyraqtar elinde jarys qojaıyndary des bermedi. Olar 14 altyn, 7 kúmis, 5 qolany oljalady. Odan keıingi oryndardy Germanııa (10+13+7), AQSh (9+5+13), Norvegııa (9+8+6), Ońtústik Koreıa (6+6+2) enshiledi.
2014 jyly Sochıde uıymdastyrylǵan Olımpıada eń daýly oıyndar retinde tarıhta qaldy. Osy jarysta jeńis tuǵyryna kóterilgen sportshylardyń birazy dopıng qoldanǵan eken. Ýaqyt oza barlyq mán-jaı anyqtalǵannan keıin olar ataqtarynan aıyrylyp qana qoımaı, abyroıdan da jurdaı boldy. Nátıjesinde, myna komandalar ozdy: Norvegııa (11+6+9), Reseı (10+10+9), Kanada (10+10+5), AQSh (9+9+10), Nıderland (8+7+9). Otandastarymyzdyń arasynan mánerlep syrǵanaýshy Denıs Ten ǵana júldeli oryndy ıelendi. Japonııalyq Iýdzýrý Hanıý men kanadalyq Patrık Channan qalyp qoıǵan ol qola medaldy moınynda jarqyratty.
2018 jylǵy Olımpııa oıyndarynyń alaýy Ońtústik Koreıanyń Phıonchhan qalasynda tutandy. Bul jarysta frıstaıl-mogýldyń has sheberi Iýlııa Galysheva qolaǵa qol sozdy. Jalpy esepte Norvegııa (14+14+11), Germanııa (14+10+7), Kanada (11+8+10), AQSh (9+8+6), Nıderlandtyń (8+6+6) kórsetkishteri joǵary boldy.
Sońǵy Olımpıadanyń alaýy osydan tórt jyl buryn, ıaǵnı 2022 jyly Beıjińde tutandy. Qytaı astanasynda 91 memleketten kelgen 2 871 sportshy baq synady. Olar 109 júlde jıyntyǵyn sarapqa saldy. Jalpy esepte Norvegııanyń (16+8+13) ekpinine eshkim shydamady. Ekinshi, úshinshi oryndarda – Germanııa (12+10+5) men AQSh (9+9+7). Tórtinshi, besinshi satyǵa Qytaı (9+4+2) men Shvesııa (8+5+5) jaıǵasty. О́kinishke qaraı, Qytaı elinde bizdiń quramaǵa birde-bir júlde buıyrmady. Mine, qysqasha qaıyrsaq jerlesterimizdiń qatysýymen ótken qysqy Olımpııa oıyndarynyń tarıhy osyndaı.
