Jınalǵan aǵashtardy tuıaqty janýarlardyń keı túrleri azyq retinde paıdalansa, maımyl, jolbarys, aıý men leopardtarǵa «oıynshyq» retinde kádege jarady. Budan bólek, qylqanjapyraqty aǵashtar men butaqtar harzalarǵa, atjalmandarǵa, kirpilerge, jaıralarǵa jumsaq tósenish qyzmetin atqardy.
Ekologııalyq jobaǵa birneshe gúl satatyn dúken men 50-den astam turǵyn ún qosqan. Haıýanattar baǵy ujymy, tapsyrylǵan aǵashtardyń ishinde tamyr júıesi saqtalǵan úsh shyrsha baryn, olardyń baq aýmaǵyna otyrǵyzylǵanyn aıtady.
«Aksııaǵa belsendi qatysqan barlyq qala turǵynyna, sharany keńinen jarııalaǵan BAQ ókilderine shynaıy alǵys bildiremiz. Kóp mólsherde qylqanjapyraqty aǵash pen butaq jınadyq. Janýarlarǵa bul qorek qana emes, sonymen birge meken etý ortasyn jaqsartýda mańyzy zor: volerdegi árbir jańa zat – jańa ıis, jańa dám jáne zertteýge múmkindik», deıdi Almaty haıýanattar baǵynyń ǵylymı-ádistemelik bóliminiń basshysy Aqjamı Elamanova.
«Shyrshany tapsyr» ekologııalyq aksııasy tabıǵat pen janýarlarǵa qamqorlyq jasaý árbir adamǵa qoljetimdi ári qarapaıym is ekenin taǵy bir márte kórsetti. Almaty haıýanattar baǵy barlyq qatysýshyǵa belsendi azamattyq ustanymy úshin alǵys bildirip, aldaǵy ýaqytta da osyndaı bastamalar jalǵasa beretinin jetkizdi. Sonymen qatar mamandar qala turǵyndaryn mereke aıaqtalǵannan keıin de qorshaǵan ortaǵa jaýapkershilikpen qarap, ekologııalyq turǵydan tıimdi sheshimder tabýǵa shaqyrdy.
ALMATY
