Is-sharaǵa aýyldyń qadirli aqsaqaldary men turǵyndary, kent ákimi, medısına salasynyń qyzmetkerleri qatysty. Kórermender nazaryna akademıktiń uly A.Sharmanov usynǵan beınesıýjet kórsetildi.
Kórme ǵalymnyń ómiri men qyzmetin kezeń-kezeńimen tanystyryp, halyq densaýlyǵyna qosqan zor úlesin pash etti.
Tóregeldi Sharmanov Ulytaý aýdanynyń aýyl dárigerinen bastap Qazaq KSR Densaýlyq saqtaý mınıstri men Qazaqstannyń Parlament depýtatyna deıin eńbek jolynan ótti. Qazaq tamaqtaný akademııasynyń basshysy boldy. 2022 jyly Densaýlyq saqtaýdy damytýǵa qosqan zor úlesi úshin «Qazaqstannyń Eńbek Eri» joǵary ataǵy berildi.
Ulytaý aýdandyq tarıhı-ólketaný mýzeıiniń bas qor saqtaýshysy Nursulý Baltabaıqyzy kórermenderdi ǵalymnyń jeke zattarymen tanystyrdy. Tóregeldi Sharmanovtyń qundy jádigerleri ǵalymnyń tulǵalyq bolmysyn, eńbektegi izdenisin, ǵylymı jolyn baıandaıdy.
Akademıktiń Almatydaǵy Taǵamtaný ınstıtýtyndaǵy jeke kabınetinen ákelingen jıhazy – kreslo men jazý ústeli birden kózge túsedi. Ǵalym osy kresloda ǵylymı eńbekter jazyp, halyqaralyq kezdesýlerge daıyndalyp, Taǵamtaný ǵylymynyń damý baǵytyn aıqyndaıtyn sheshimder qabyldaǵan.
Kabınet edenine tóselgen, qazaqy órnegi mol qoldan toqylǵan kilemnen týǵan eline degen súıispenshilik seziledi. Sheteldik áriptesterdiń biri syıǵa tartqan aıý terisinen jasalǵan kádesyı – tósenish. Bul syılyq akademıktiń halyqaralyq bedelin, sheteldik ǵylymı qaýymdastyqpen tyǵyz baılanysyn kórsetedi.
Akademıktiń mantııasy men shapany – ǵylymdaǵy bıik mártebesi men abyroıly eńbeginiń aıǵaǵy. О́z ýaqytynda otandyq jáne halyqaralyq deńgeıdegi jıyndarǵa osy kıimmen qatysyp, qazaq ǵylymynyń abyroıyn asqaqtatqan. Kórmede Tóregeldi Sharmanovtyń maıly boıaýmen salynǵan portreti, ustaǵan portfeli men kózildirigi de bar.
Usynylǵan foto sýretteri, marapattary, qujattary – ǵalymnyń ómir jolynan, memleket pen halyqqa jáne ǵylymǵa sińirgen qyzmetinen syr shertedi. Taǵamtaný ǵylymyndaǵy jańa baǵyttardy qalyptastyrǵan, ult saýlyǵyn nyǵaıtýǵa arnalǵan irgeli zertteýlerdiń jemisindeı – kitaptary men eńbekteri de izdengen oqyrmanǵa oı salady. Syıǵa tartylǵan túrli sývenırler álemdik ǵylymı ortadaǵy bedelin kórsetkendeı áser qaldyrady.
«Akademık dúnıeden ótken soń uly Almaz Tóregeldiuly áke murasyn ardaqtap, Taǵamtaný ınstıtýtyndaǵy kabınetindegi jeke qoldanǵan jıhazdary men kitaptaryn, eńbekteri men marapattaryn, sondaı-aq quttyqtaý hattary men qundy zattaryn túgeldeı Ulytaý aýdandyq tarıhı-ólketaný mýzeıiniń qoryna tabystady. Osy ıgi isiniń arqasynda mýzeıde arnaıy «Akademık Tóregeldi Sharmanov kabıneti» jasaqtalyp, jurtshylyqqa esigin aıqara ashty. Kórme 14-19 qańtar aralyǵynda kópshilik nazaryna usynyldy» deıdi Ulytaý aýdanynyń tarıhı-ólketaný mýzeıiniń bas qor saqtaýshysy Nursulý Baltabaıqyzy.
Jezdidegi jergilikti aqsaqaldar T.Sharmanovtyń ómiri men eńbegi týraly estelikter aıtty. Ǵalymnyń ult saýlyǵy jolyndaǵy sińirgen eńbegi týraly maǵlumattar usynyldy. Kórmeniń ashylýymen quttyqtaǵan kent ákimi M.Jumabek ultqa qyzmet etken tulǵany ulyqtaǵan Ulytaý aýdanynyń tarıhı-ólketaný mýzeıiniń ujymyna alǵys hat tabystady.
«Baqyt – bul densaýlyq. Baqyttyń negizi – densaýlyq. Eger men halyqqa qandaı da bir jolmen kómektese alsam, ony saý etsem, men baqyttymyn», degen ult saýlyǵyna janashyr bolǵan Tóregeldi abyzdyń esimi umytylǵan joq. Murasy týǵan jeriniń tósinde tur!
Ulytaý oblysy
Ulytaýda «Akademık Tóregeldi Sharmanovqa taǵzym» atty oblystyq kórme ashyldy
