Bolashaǵy zor osy nysanǵa at basyn burǵan týrıster tútini órge býdaqtaǵan sary samaýrynnyń shaıynan dám tatýǵa asyǵady. Sebebi samaýrynnyń shaıy taýly óńirdiń salqyn aýa raıynda boıdy jylytsa, jazda shól basary anyq. Biz de býy býdaqtaı qaınap turǵan jez samaýrynǵa taıap, ıesinen biraz málimettiń syryna qanyqtyq.
«Bul bizdiń áýlettiń jádigeri sanalady. Qoldanysta júrgenine shamamen 80 jyldan asypty. Analarymyz kózdiń qarashyǵyndaı saqtap, urpaqtan-urpaqqa amanat etip keledi. Tarıhy tereń samaýryn otbasyna ǵana emes, jyl on eki aı alys-jaqyn shetelden aǵylǵan myńdaǵan týrıstke qyzmet etip tur. Shaı iship qana qoımaı, estelik úshin sýretke túsip jatady», deıdi ottyǵyna aǵash jańqalaryn salyp jatqan kásip ıesi Tólegen Qunypııaev.
Osylaısha, tabıǵattyń tańǵajaıyp kórinisin tamashalaýshy týrısterge qazaqtyń shaı ishý dástúrin dáripteýge de úles qosyp júrgen azamattardyń isine bereke bersin deımiz.
Almaty oblysy,
Kegen aýdany
