30 emdeý mekemesi iske qosyldy

Buǵan deıin aýyldaǵy eki páterli turǵyn úıdiń be­ıimdelgen tar bólmesin panalap kelgen medısınalyq pýnkt endi eńseli ǵımaratqa kóshti. Jańa nysannyń jalpy aýmaǵy – 196,4 sharshy metr. Bul – medısına qyzmetkerleriniń alańsyz jumys isteýine, aýyl turǵyndarynyń sapaly em qabyldaýyna jasalǵan qolaıly jaǵdaı.

Jańa ǵımarat materıaldyq-teh­nıkalyq jaǵynan tolyq qamtama­syz etilgen. Prosedýralyq kabınet sońǵy úlgidegi quryl­ǵylarmen jab­dyqtalǵan. Atap aıtqanda, ókpeniń tynys alý fýnksııasyn tekseretin spırometr, júrek qyzmetin baqy­laıtyn kardıograf, tynys joldary men qulaq aýrýlaryn emdeý­ge arnalǵan kvars shamdary orna­tylǵan. Sonymen qatar naýqastar qajettiligine qaraı magnıt órisimen emdeý, nebýlaızer apparaty arqyly ıngalıasııalyq sharalar júrgiziledi.

Qazir Ivanovka aýylynda turaq­ty qyzmet etetin bir medbıke 500-den astam turǵynǵa, onyń ishinde 14 jasqa deıingi 114 balaǵa alǵashqy medısınalyq kómek kórsetedi. Al dáriger arnaıy kestege saı, Altaı aýylyndaǵy ambýlatorııadan aptasyna bir ret kelip, qabyldaý júrgizedi.

Oblystyq densaýlyq saqtaý basqarmasynyń málimetinshe, bul nysan – aýyldyq jerdegi medısına sapasyn arttyrýǵa baǵyttal­ǵan aýqymdy jumystyń bir parasy ǵana. Jalpy, 2024–2025 jyldary óńirde atalǵan baǵdarlama aıasyn­da ­30 jańa medısınalyq nysan salyn­ǵan. Qurylys jumystaryna bıýdjetten 4 mlrd 800 mln teńge qara­jat jumsalǵan. Nátıjesinde, oblys boıynsha 2 dárigerlik ambýlatorııa, 5 feldsherlik-akýsherlik pýnkt, 23 medısınalyq pýnkt paıdala­ný­ǵa berildi. Osy ıgi istiń ıgiligimen aýyldyq jerdegi 15 myńnan astam turǵyn sapaly medısınalyq qyzmet­pen qamtylyp otyr.

Pavlodar oblysy