Foto: alataunews.kz
Ádilet mınıstri Negizgi zań tek zań aktisi ǵana emes, sonymen birge qoǵamdyq kelisim qujaty bolyp tabylatynyn, sondyqtan onyń tili normalardy tikeleı jáne birjaqty qabyldaýdy qamtamasyz etýi tıis ekenin atap ótti.
Onyń aıtýynsha, kúrdeli jáne asa qurmalas tujyrymdar azamattardyń quqyqtary men mindetterin túsinýdi qıyndatady, sondaı-aq Konstıtýsııanyń ústemdik prınsıpin álsiretedi.
«Konstıtýsııanyń mátini mazmunnyń quqyqtyq dáldigi men tereńdigine nuqsan keltirmesten qoljetimdi jáne túsinikti túrde tujyrymdalýy kerek. Konstıtýsııalyq erejeler túsinikti, qısyndy jáne stılıstıkalyq turǵydan durys bolýy tıis», dedi Erlan Sársembaev.
Sonymen qatar, mınıstr Konstıtýsııada jekelegen aýmaqtar úshin arnaıy quqyqtyq rejımderdi engizý múmkindigin bekitýdi usyndy.
Ol Prezıdenttiń jarlyǵymen Alataý qalasyna ozyńqy damýshy qala mártebesi berilgenin, al bolashaqta bul mártebeni jekelegen Konstıtýsııalyq zańmen resimdeý boljanyp otyrǵanyn eske saldy. Onyń pikirinshe, mundaı tásil osy tetikti ınstıtýsıonalızasııalaýǵa, quqyqtyq boljamdylyqty qamtamasyz etýge jáne quqyqtyq keńistiktiń birligin saqtaýǵa múmkindik beredi.
«Aýmaqtyń erekshe mártebesi óziniń quqyqtyq tabıǵaty boıynsha quqyqtyq retteýdiń jalpy rejıminen erekshelik bolyp tabylady. Mundaı erekshelikterge olardyń tikeleı Konstıtýsııalyq negizi, naqty zańnamalyq resimdelýi jáne quqyqtyq memleket qaǵıdattaryn qatań saqtaý shartymen ǵana jol beriledi», dedi mınıstr.
Sońynda ol arnaıy rejımderdi Konstıtýsııalyq bekitý ınvestısııalar tartý jáne ınfraqurylymdy damytý úshin turaqty jáne ashyq quqyqtyq baza quratynyn aıtty. Bul rette kez kelgen sheshimder maqsattary men merzimderi boıynsha shektelýge, azamattar úshin áleýmettik jáne quqyqtyq kepildikter deńgeıin tómendetpeýge tıis.
