Jıyndy júrgizgen Aıdos Sarym áýekompanııalary men áýejaılardyń qyzmeti boıynsha tutynýshylardan kóptegen shaǵym túskenin atap ótti. Olar reısterdiń sebepsiz keshigýi, qoljetimdi oryndarǵa qaraǵanda bıletterdiń kóp satylýy, artyq brondaý (overbýkıng) máselelerine baılanysty.
Otyrysta baıandama jasaǵan Kólik mınıstrligi Azamattyq avıasııa komıtetiniń tóraǵasy Saltanat Tompıeva ótken jyldyń qorytyndysynda elimizdiń áýejaılary 31,8 mln jolaýshyǵa qyzmet kórsetkenin, onyń ishinde 15,4 mln jolaýshyny otandyq áýe kompanııalary tasymaldaǵanyn habarlady. Qazirgi tańda ishki áýe tasymaldary 42 baǵyt boıynsha júzege asyrylyp, aptasyna 643 reısti qamtıdy. Halyqaralyq áýe qatynasynda 30 el men 135 baǵytta aptasyna 626 reıs jasalady.
«M. Qozybaev atyndaǵy Soltústik Qazaqstan ýnıversıteti» KAQ Dırektorlar keńesiniń tóraǵasy, Qoǵamdyq palata tóraǵasynyń orynbasary Ǵalym Baıtoq ta óz ustanymyn aıtty. Ol ishki reısterde qaıtarymsyz bıletterge tyıym salýdy nemese olardy kepildi qaıtarýdy, ne bolmasa ushý kúnin tegin ózgertý tetikterimen almastyrýdy usyndy. Sondaı-aq el ishindegi loýkosterlerdi, az jolaýshyly jáne jeńil kommersııalyq avıasııany damytý, sondaı-aq marshrýttyq jelini tek iri habtar men oblys ortalyqtaryna ǵana táýeldi bolmaıtyndaı etip qalyptastyrý qajettigin atap ótti.
Eýrazııalyq Tutynýshylar Odaǵy basqarmasynyń tóraǵasy, Qoǵamdyq palata tóraǵasynyń orynbasary Svetlana Romanovskaıa da birqatar usynysyn ortaǵa saldy. Ol «Tutynýshylardyń quqyqtaryn qorǵaý týraly» zań tolyq aqparat alý jáne shyǵyndardy óteý quqyǵyn naqty bekitetinin atap ótti. Alaıda azamattyq avıasııa salasynda bul normalar kóbine tek qaǵaz júzinde qalady da, salalyq erejelerdiń yqpaly kúshtirek bolyp ketedi. Onyń aıtýynsha, osyǵan baılanysty aınalymdyq aıyppuldarǵa kóshý, úsh saǵattan astam keshigý kezinde ótemaqyny avtomattandyrý jáne taǵy basqa júıeli sharalardy engizý qajet.
Vıse-mınıstr: Áýe bıletterin tolyq qaıtarý – baǵany sharyqtatady
Jaýap retinde áýe kompanııalarynyń ókilderi – «Air Astana» AQ aǵa vıse-prezıdenti Erbolat Baısalyqov pen «QAZAQ AIR» AQ basqarma tóraǵasy Ádilbek О́mirálıev sóz sóıledi. Sonymen qatar, azamattyq avıasııa júıesin jáne salalyq zańnamany jetildirý boıynsha usynystaryn Májilis depýtattary Murat Ábenov, Anas Bakqojaev jáne Irına Smırnova, sarapshy Natalıa Molıarchýk, «Qazaqstandaǵy parlamentarızmdi damytý qory» QQ prezıdenti Zaýresh Battalova, sondaı-aq Qoǵamdyq palata músheleri men otyrysqa qatysýshylar aıtty.
Usynystar men saraptamalyq pikirler júıelendirilip, «Tutynýshylardyń quqyqtaryn qorǵaý týraly» jańartylǵan zań jobasy boıynsha jumys tobyna joldanatyn Qoǵamdyq palatanyń qorytyndy usynymdaryna engiziletin bolady.
