О́tken aptada aımaq ákimi Berik Ýálı Semeı qalasyndaǵy oblystyq jedel medısınalyq járdem stansııasyna sol tehnıkalardyń alǵashqy legin – 10 sanıtarlyq avtokóliktiń kiltin saltanatty túrde tabystady.
«Bul nysan qazir sanıtarlyq avtokóliktermen tolyq qamtamasyz etilgen. Alaıda tehnıkalardyń jalpy tozý deńgeıi 90 paıyzdan asady. Osy máseleni sheshý úshin byltyr «Abaı oblysy medısınalyq uıymdary úshin sanıtarlyq avtokólik satyp alý» jobasy sheńberinde «О́nerkásipti damytý qory» AQ-men birlesip, oblystyq bıýdjet qarajaty esebinen lızıngtik qarjylandyrý arqyly Hyundai, JAC jáne «Gazel» markaly 100 sanıtarlyq avtokólikter satyp alyndy. Onyń ishinde 67 avtokólik oblystyq jedel medısınalyq járdem stansııasyna, 33 avtokólik aýdandaǵy medısınalyq uıymdarǵa beriledi. Barlyq avtokólikter GPS-navıgasııamen jáne halyqqa medısınalyq kómek kórsetýge qajetti medısınalyq jabdyqtarmen tolyq jabdyqtalǵan», deıdi oblystyq densaýlyq basqarmasy.
Saltanatty is-shara barysynda aımaq basshysy densaýlyq saqtaý salasyn damytý óńir úshin basym baǵyttardyń biri ekenin, jańa avtokólikter jedel medısınalyq kómektiń sapasy men tıimdiligin arttyrýǵa múmkindik beretinin aıtty.
«Memleket basshysy Qasym-Jomart Toqaev Qyzylordada ótken Ulttyq Quryltaıdyń besinshi otyrysynda sóılegen sózinde: «Memlekettiń bilim berý jáne densaýlyq saqtaý salasyna jumsap jatqan qarjysy, eń aldymen, azamattarymyzdyń turmys sapasyn arttyrýǵa arnalatynyn jáne Ádiletti Qazaqstandy qurý strategııasymen ushtasyp jatqanyn túsingen abzal» degen bolatyn. Búgin halyq ıgiligine berilgen jedel járdem kólikteri osy baǵyttaǵy óńirlik jumystyń bir parasy. Mundaı jańa kólikter oblysymyzǵa 2020 jyly alynǵan eken. Iаǵnı, bes jarym jyldan beri osy salaǵa jańa kólikter alynbaǵan. Búgingi oqıǵa Abaı oblysynyń densaýlyq saqtaý júıesi úshin erekshe mańyzǵa ıe. Sanıtarlyq avtokóliktiń jańa avtomobılderin jedel medısınalyq járdem qyzmetine tabystaý – halyqqa kórsetiletin shuǵyl medısınalyq kómektiń qoljetimdiligi men deńgeıin arttyrýǵa múmkindik berip, óńir turǵyndarynyń ómir sapasyn jaqsartýǵa úlken úles qosary sózsiz», dedi oblys ákimi.
Aqtóbelikter jedel járdemniń qozǵalysyn Iаndeks Go qosymshasynan kóre alady
Búginde oblystyq jedel medısınalyq járdem stansııasynda 872 adam eńbek etedi. Mekeme óńirdiń 620 myńnan astam turǵynyna kún saıyn qyzmet kórsetip keledi. Olar jylyna 250 myńnan astam shaqyrtýǵa shyǵady.
«О́ńirdiń densaýlyq saqtaý salasynyń ınfraqurylymyn damytý maqsatynda júıeli jumys júrgizilip jatyr. Byltyr alǵashqy medısınalyq-sanıtarııalyq kómek kórsetetin 60-tan astam jańa nysan salyndy. Maqanshy aýylynda kúndizgi stasıonary, zerthanasy jáne áıelder konsýltasııasy bar dárigerlik ambýlatorııa ashyldy. Aıagóz aýdanynyń kópsalaly ortalyq aýdandyq aýrýhanasynyń 10 tósektik reanımasııalyq bólimshesiniń qosymsha qurylysy aıaqtaldy. Osy medısınalyq mekemede magnıttik-rezonanstyq tomografty ornalastyrý úshin qosymsha ǵımarattyń jáne Úrjar aýdanynyń kópsalaly ortalyq aýdandyq aýrýhanasy bazasynda «Teri arqyly koronarlyq aralasý ortalyǵy» ǵımaratynyń qosymsha qurylysy bastaldy. Úkimettiń qoldaýymen salynatyn 300 oryndyq oblystyq kópbeıindi aýrýhana men 200 oryndyq oblystyq kópbeıindi balalar aýrýhanasynyń jobalyq smetalyq qujattamalary jasalyp jatyr», deıdi oblys ákiminiń baspasóz qyzmeti.
Olardyń málimetinshe, jalpy 2025 jyly oblystyń densaýlyq saqtaý salasynyń materıaldyq-tehnıkalyq bazasyn jańǵyrtýǵa 6 jarym mıllıard teńgeden astam qarjy bólindi.
