Kórmede kelýshiler eston mádenıetiniń eń tanymal ári poetıkalyq qyrlarynyń biri – qolǵap toqý dástúrimen tanysty. Uıymdastyrýshylardyń aıtýynsha, Estonııada qolǵaptar ǵasyrlar boıy soltústik klımat jaǵdaıynda kúndelikti turmys qajetine ǵana emes, sonymen qatar sulýlyqqa, sheberlikke jáne halyq jadyndaǵy rýhanı dástúrlerge degen qurmettiń sımvolyna aınalǵan.
Kórmeniń tujyrymdamasy «Tilek aǵashy» ıdeıasynan alynǵan, onda qolǵaptar aǵashtyń «jemisteri» ispetti – ıesiniń jan dúnıesimen qolynyń jylýyn saqtaıdy degen támsil bar.
Ekspozısııada Orta ǵasyrlardan búgingi kúnge deıingi úlgilerden shabyt alatyn buıymdar usynyldy. Olardaǵy árbir órnek pen qoldanylǵan tús óz dáýiri men aımaqtyq erekshelikterinen syr shertetin sheberdiń jeke týyndysy.
Kórmede qoıylǵan jumystar Eston ulttyq mýzeıiniń túpnusqa kolleksııalaryna súıene otyryp, Tartý ýnıversıtetiniń Vılıandı mádenıet akademııasymen birlesip jasalǵan artefaktilerdiń kóshirmeleri.
«Jobanyń maqsaty – halyq qolónerin saqtaý men nasıhattaý, dástúrli ádisterdi zertteý jáne kásibı sheberlikti damytý. «Qolmen órilgen qolǵap syry» jyljymaly kórmesi buǵan deıin Vengrııa, Nıderland, Fransııa, Belgııa, Bolgarııa, Grekııa, Estonııa elderinde kórsetilip, endi Qazaqstan kórermenine jol tartyp otyr. Eki el de jyl mezgilimen, qolóner sheberligi jáne mádenı muraǵa degen qurmetimen erekshelenedi», deıdi Ulttyq Ortalyq mýzeıdiń baspasóz qyzmeti.
