Azyq-túlik baǵasy turaqty baqylaýda

Jekelegen taýarlar boıynsha baǵa tómendegeni baıqaldy. Máselen, alma (-2,1%), qııar men pııaz (-1,3%), shaı (-0,9%), balyq pen taýyq eti (-0,6%) arzandaǵan. Osyǵan qosa basqa da birqatar azyq-túlik ónimderinde tómendeý tirkelgen. Al maýsymdyq sıpatqa ıe kókónister boıynsha baǵa qubylmaly bolyp otyr.

Saýda jáne ıntegrasııa birinshi vıse-mınıstri Aıjan Bıjanova aýyl sharýashylyǵy ónimderiniń erte pisetin túrlerin jetkizýge qatysty qabyldanyp jatqan sharalar jóninde baıandady. Onyń aıtýynsha, naryqta usynysty kóbeıtý úshin bıyl sáýir-maýsym aılary aralyǵynda úshinshi elderden kókónisterdi bajsyz ákelý týraly usynys EAEO Keńesiniń qaraýyna shyǵarylmaqshy. Bul – baǵa turaqtylyǵyn qamtamasyz etý baǵytyn­daǵy qosymsha qadamdardyń biri.

Keńes barysynda vıse-premer Astana men Almaty qalasy ákimderiniń orynbasarlaryn tyńdap, óńirlerdegi aǵymdaǵy jaǵdaıǵa jeke-jeke toqtaldy. Elordada azyq-túlik ınflıasııasynyń baıaýlaý úrdisi saqtalyp, 2025 jyldyń qorytyndysy bo­ıynsha áleýmettik mańyzy bar taýarlardyń ortasha baǵa ındeksi 107,4% deńgeıinde qalyptasqan. Bul el boıynsha eń turaqty kórsetkish­terdiń biri sanalady. Baǵany ustap turýǵa ýaqtyly kelisimsharttar jasaý men iri saýda jelilerimen saýda úste­mesin shekteý jónindegi kelisimder sep bolǵan. Elordada búginde 180-nen astam saýda núktesi áleýmettik taýarlardy satady. Sonymen qatar deldaldyq shemalardy anyqtaý, jármeńkeler sanyn arttyrý baǵytyndaǵy sharalar jalǵasyp jatyr. 2026 jyly Astanada 300-den astam demalys kúngi jármeńke ótkizý josparlanǵan, al jalpy el boıynsha 10 myńǵa jýyq jármeńke uıymdastyrylady.

Almaty qalasynda 2025 jyldyń qory­tyndysy boıynsha áleýmettik mańyzy bar azyq-túlik taýarlarynyń baǵa ındeksi 8,9%-dy quraǵan, al jyl basynan beri ósim nebári 0,2% deńgeıinde. Qalada et pen sút ónimderiniń negizgi túrleri boıynsha baǵa turaqty, al taýyq eti men jekelegen sút ónimderi arzan­daǵan. Baǵanyń ósýi kóbine kókónis­ter men bakaleıa taýarlaryna tıesili. Degenmen Almatyda qyryqqabat pen qaraqumyq jar­masynyń baǵasy respýblıkalyq or­ta­sha kórsetkishten tómen. Qala bı­ligi baǵany turaqtandyrýǵa tikeleı jet­kizý tizbegin keńeıtýge, demalys kúngi jármeńkeler sanyn ulǵaıtýǵa jáne saýda jelileri men bazarlarda baǵa monı­torıngin kúsheıtýge den qoıyp otyr.

Jıyndy qorytyndylaı kele, Serik Jumanǵarın óńirlerdegi jumysty jandandyrýdy tapsyrdy. Ol aýmaqtyq saýda men tutynýshylardyń quqyqtaryn qorǵaý departamentterine áleýmettik mańyzy bar taýarlarǵa belgilengen shekti saýda ústemesiniń saqtalýyn qatań baqylaýdy ári monıtorıngti kúsheıtýdi mindettedi.