Áńgime barysynda Teńiz, Qashaǵan jáne Kaspıı qubyr konsorsıýmy (KQK) aıasyndaǵy ortaq jobalardyń qazirgi ahýaly men bolashaqtaǵy damý baǵyttary qarastyryldy.
Elimizdiń Úkimet basshysy Teńiz ken ornyndaǵy jaǵdaıǵa baılanysty alańdaýshylyq bildirip, apat saldaryn qysqa merzimde joıýdyń jáne uqsas oqıǵalardyń aldyn alýǵa tıimdi tetik qalyptastyrýdyń mańyzyn atap ótti. Onyń aıtýynsha, jedel áreket etý, qaýipsizdik standarttaryn kúsheıtý men jaýapty kompanııalarmen tyǵyz ózara is-qımyl jasaý – basty mindetterdiń biri.
Taraptar, sondaı-aq Kaspıı qubyr konsorsıýmyndaǵy ahýaldy egjeı-tegjeı talqylady. Bul baǵyt energetıkalyq resýrstardy syrtqy naryqtarǵa turaqty negizde jetkizýdi qamtamasyz etetin asa mańyzdy ınfraqurylymdyq arterııa sanalady. Sol sebepti jobanyń úzdiksiz jumys isteýi eki tarap úshin de strategııalyq mánge ıe ekeni aıtyldy.
Kezdesýde kómirsýtek ken oryndaryn ıgerý tıimdiligin arttyrý máseleleri de nazardan tys qalǵan joq. Atap aıtqanda, geologııalyq barlaýdy keńeıtý, jańa tehnologııalardy engizý, ınvestısııalyq tartymdylyqty nyǵaıtý baǵyttary qaraldy. Bul sala Memleket basshysy Qasym-Jomart Toqaevtyń Ulttyq quryltaıdyń V otyrysynda júktegen mindetterimen úndes keledi. Prezıdent atap ótkendeı, resýrstyq ekonomıkadan ozyq tehnologııalar men óńdeý sektoryna qaraı kezeń-kezeńimen kóshý úshin geologııalyq derekter bazasyn jetildirip, barlaý jumystaryn kúsheıtý asa qajet.
Kezdesý qatysýshylary bıylǵy óndiristik josparlarǵa da toqtaldy. Byltyr Teńiz ken ornynda Keleshekte keńeıtý jobasynyń aıaqtalýy munaı óndirý kólemin arttyrýǵa múmkindik berdi, jyl qorytyndysy boıynsha 39 mln tonnadan astam shıkizat óndirilse, Qashaǵanda bul kórsetkish 18 mln tonnadan asty. Al Kaspıı qubyr konsorsıýmy arqyly eksporttalǵan munaı men energetıkalyq resýrstar kólemi 70,5 mln tonnaǵa jetti. Onyń qatarynda otandyq munaı 63,8 mln tonnany qurady.
Bul kórsetkishter halyqaralyq energetıkalyq naryqtaǵy qubylmaly jaǵdaıǵa qaramastan, elimizdiń munaı-gaz sektory eksporttyq áleýetin saqtap otyrǵanyn dáleldeıdi. Úkimet pen sheteldik seriktester arasyndaǵy ashyq dıalog óndiristik qaýipsizdikti kúsheıtýge, barlaý-óndirý úderisterin ońtaılandyrýǵa ári energetıkalyq dálizderdiń turaqtylyǵyn qamtamasyz etýge baǵyttalǵan mańyzdy qadam sanalady.
