Sondaı-aq jańadan Halyq keńesi qurylatyn boldy. Iаǵnı QHA men Ulttyq quryltaı birigip, jylyna bir márte bas qosatyn irgeli keńesshi organ retinde jumys istemek.
Prezıdent óz sózinde Qyzylorda óńiriniń qaryshty damýyna oń baǵasyn berdi. Bizdiń nazarymyzǵa óner men mádenıet máseleleri týraly aıtqan sózderi tústi.
«Memlekettik saıasattyń strategııalyq baǵdarynyń biri – mádenıet pen óner. Sebebi qoǵamnyń sanasy jańǵyrmasa, reformalar oıdaǵydaı nátıje bermeıdi. Bul – aqıqat. Sondyqtan biz rýhanııat máselelerine aıryqsha mán beremiz. Bul salada buryn-sońdy bolmaǵan aýqymdy sharýalar qolǵa alynady. Atap aıtqanda, Almaty oblysynda qazaq drama teatry, Abaı, Aqtóbe oblystarynda teatrlar boı kóteredi. Shymkentte de opera jáne balet teatrynyń qurylysy bastalmaq.
Bıyl Muhtar Áýezov atyndaǵy Qazaq ulttyq drama teatrynyń ashylǵanyna 100 jyl toldy. Osyǵan oraı, teatr ǵımaratyna júrgizilip jatqan kúrdeli jóndeý jumysy aıaqtalmaq.
Natalıa Sas atyndaǵy orys memlekettik akademııalyq balalar men jasóspirimder teatry da jańǵyrtylady. Budan bólek, eki jyldyń ishinde elimizde 100-den astam mádenıet oshaǵy jóndeledi».
Mýzeı isin damytý – mańyzdy mindettiń biri ekenin aıtqan Prezıdent Qyzylordada ashylǵan jańa tarıhı-ólketaný mýzeıin erekshe atap óttti.
«Men kúzde qalaǵa jumys saparymen kelgende murajaıdy aralap kórdim. Zaman talabyna saı salynǵan ortalyqta mýzeı isin uıymdastyrýdyń tyń tásilderi qoldanylǵan. Bul tájirıbeni basqa oblystarǵa úlgi etýge bolady.
Qyzylordada jańa drama teatr salý josparymyzda bar, bıyl qurylysty bastaýymyz kerek. О́tken saparymda men oblystyń zııaly qaýym ókilderimen kezdesken kezde zamanaýı kitaphana salý kerek dep aıttym. Endi bul qurylys bıyldan bastap júrgiziledi», dedi Memleket basshysy.
Mine, rýhanı salada osyndaı jańalyqtar júzege asady. Rýhy myqty elge aınalsaq, basqa máselelerdi tez eńserýge bolady.
Nurtóre JÚSIP,
Senat depýtaty
