«Úndi kórermenine qazaq ánderiniń, onyń ishinde Abaıdyń, Táttimbettiń, qazaq klassıkalyq shyǵarmalarynyń oryndalýy úlken áser qaldyrdy. Mundaı konserttik baǵdarlamalar eki el arasyndaǵy birinshi kezekte mádenı dıplomatııany odan ári nyǵaıtýǵa septigin tıgizedi», dedi Úndistandaǵy Qazaqstan elshiliginiń dıplomaty Qaırat Nurmolda.
Úndi jurty men shetelden barǵan qonaqtar qazaqtyń klassıkalyq mýzykasymen tanysyp, dástúrli bılerin tamashalady. Sahna tórinde Abaıdyń ánderi shyrqalyp, Qurmanǵazynyń kúıleri tartyldy. Baǵdarlama aıasynda bizdiń ónerpazdar úndistandyq kórnekti mýzykanttar – Lakshmınaraıana Sýbramanıam jáne Kavıta Krıshnamýrtımen birlesip óner kórsetti.
«Konsertte ataqty kompozıtor Sýbramanıammen, dırıjer Abzal Mırasbekulymen, kompozıtormen jumys isteý biz úshin úlken mártebe. Osy elde Qazaqstannyń ataǵyn shyǵaryp, namysyn qorǵaý biz úshin zor qurmet», deıdi Úkili Ybyraı atyndaǵy Aqmola oblystyq fılarmonııasy «Gákký» bı ansambliniń solısi Gúldana Shoqparova.
Atalǵan joba qazaq-úndi mádenı dıplomatııasynyń jarqyn úlgisin kórsetip, halyqtar arasyndaǵy ózara túsinistikti nyǵaıtýǵa, sondaı-aq Qazaqstannyń halyqaralyq mádenı bedelin arttyrýǵa yqpal etti. Buǵan deıin konserttik baǵdarlamalar Kalkýtta, Delı, Chandıgarh qalalarynda usynyldy. Gastroldik sapar Bangalor qalasynda jalǵasady.
