Sýretti túsirgen – Aqádil Rysmahan
№70 orta mekteptiń ashylý saltanatyna qatysqan óńir basshysy Erbol Qarashókeev óńirde aǵartý salasyn órkendetý maqsatynda qolǵa alynǵan aýqymdy jumys ilki sátke de toqtamaıtynyn, jasóspirimderdiń sapaly bilim alýy úshin qoldan kelgenshe jaǵdaı jasalatynyn jetkizdi.
«Memleket tarapynan bilim berý salasyna kórsetilip jatqan qoldaýdyń nátıjesinde keıingi jyldary óńirde kóptegen aýqymdy jumys atqarylǵanyn kózi qaraqty jurt kórip otyr. «Keleshek mektepteri» ulttyq jobasy aıasynda buǵan deıin 6 bilim ordasy paıdalanýǵa berilgen bolatyn. Aýqymdy jobanyń arqasynda oblysta úsh aýysymdy mektep máselesi sheshimin tapty.
Jalpy alǵanda óńir halqy ulttyq jobanyń sharapatyn kórip otyrǵany anyq. Búgin sol ıgi bastamanyń jalǵasy retinde oblys ortalyǵynda taǵy bir irgeli bilim uıasy esigin aıqara ashyp otyr. Bul – jas urpaqtyń sapaly bilim alyp, bolashaqta óz jolyn naqty aıqyndaýyna baǵyttalǵan asa mańyzdy qadam. Osy baǵyttaǵy jumys ármen qaraı da jalǵasady», dedi oblys basshysy.
Jańa mekteptiń tehnıkalyq bazasymen tanysqan óńir basshysy oqý ordasynyń ujymyna ınteraktıvti taqtanyń sertıfıkatyn tabystap, bilim alýshylarǵa izgi tilegin jetkizdi.
Ýaqyt suranysyna saı salynǵan jańa mektepte 33 oqý kabıneti, májilis zaly, ashana, eki birdeı sport zaly, STEM jáne robottehnıka kabınetteri, eki kompıýter synyby, kitaphana, úsh zerthana, úsh sheberhana jáne bes kovorkıng ortalyǵy bar.
Resmı derekke sensek, mektepte 723 oqýshy bilim nárimen sýsyndap otyr. Tolyqtaı jańa qural-jabdyqpen qamtylǵan oqý ordasynda 60-qa jýyq bilikti pedagog jumys isteıdi.
Jambyl oblysy
