Oblystyq qurylys, sáýlet jáne qala qurylysy basqarmasynyń basshysy Nurbergen Qusaıynovtyń deregine qaraǵanda, «Aýyldyq densaýlyq saqtaýdy jańǵyrtý» ulttyq jobasy aıasynda 15 nysannyń qurylysy bastalypty. Byltyr 13 nysan paıdalanýǵa berilgen. Densaýlyq saqtaý nysandaryn salýdaǵy basty maqsat – aýyl turǵyndaryna medısınalyq kómektiń qoljetimdiligin arttyrý. Sol sebepten qazir birneshe aýrýhana, emhana men dárigerlik ambýlatorııanyń jobalyq-smetalyq qujattamasyn ázirleý qolǵa alynyp jatyr.
Jaqynda Atyraý qalasynyń ákimshilik bólinisindegi Almaly, Bereke aýyldarynda árqaısysy 25 oryndyq jańa dárigerlik ambýlatorııa iske qosyldy. Aýyl turǵyndaryna alǵashqy medısınalyq-sanıtarlyq kómek kórsetýge arnalǵan ambýlatorııaǵa standartqa saı 170 adamǵa bir ýchaskelik dáriger bekitildi. Munda terapııalyq qabyldaý, jalpy praktıka dárigeriniń qyzmeti, profılaktıkalyq tekserýler, júkti áıelder men balalardy baqylaý, vaksınasııa, jedel jaǵdaılarda alǵashqy kómek kórsetý isi uıymdastyrylady.
Sondaı-aq Qurmanǵazy aýdanyndaǵy Afanasev temirjol beketinde jańa feldsherlik-akýsherlik pýnkt jumysyn bastady. Aýdan ortalyǵynan 25 shaqyrym qashyqtyqta ornalasqan bekette 208 turǵyn bar. Jańa medısınalyq nysanda eldi meken turǵyndary dárigerge deıingi alǵashqy medısınalyq kómekpen tolyq qamtylady.
Buǵan qosa Atyraý oblystyq jedel medısınalyq járdem stansasynyń sanıtarlyq kólik parki jańa tehnıkamen tolyqty. Jańa kólikter «Teńizshevroıl» kompanııasynyń áleýmettik jaýapkershiligi aıasynda satyp alynǵan.
«Ujymdyq áleýmettik jaýapkershilik sheńberinde óńirdegi iri ken ornyn ıgerip jatqan kompanııa jedel járdem qyzmetine avtokólikter alyp berdi. Bul óńir turǵyndaryna kórsetiletin shuǵyl medısınalyq kómektiń tıimdiligi men sapasyn arttyrýǵa múmkindik týdyrady. Bıyl úsh qosalqy beketi bar zamanaýı jedel medısınalyq járdem stansasynyń qurylysyn aıaqtaý josparlanyp otyr. Bul da medısınalyq qyzmet sapasyn jetildirý jolyndaǵy kezekti qadam bolmaqshy», dedi oblys ákimi Serik Shapkenov.
Jedel járdem qyzmetiniń avtoparkine berilgen tehnıkanyń arasynda JAC markaly 10, GAZelle Next bazasyndaǵy 15 avtokólik sanıtarlyq kólik bar. Bári alǵashqy medısınalyq kómek kórsetýge qajetti zamanaýı jabdyqtarmen tolyq jaraqtalǵan.
Qazir oblysta 48 jedel járdem brıgadasy táýlik boıy jumys isteıdi. Onyń ishinde bir reanımasııalyq-ıntensıvti, bir pedıatrııalyq, 46 feldsherlik brıgada bar. Byltyr atyraýlyqtardan 103 qyzmetine 329 myń 610 shaqyrtý túsken. Jedel járdem qyzmetkerleri 17 myńnan astam turǵynǵa telefon arqyly keńes bergen. 299 myń 906 naýqasqa jedel medısınalyq kómek kórsetken.
Atyraý oblysy
