Saltanatty jıynda birinshi bolyp sóz alǵan lıseı dırektory Gúlshat Qaltaeva «Bolashaq prokýrorlar klýbynyń» ashylýyn mekteptegi mańyzdy kezeń retinde atap ótti. Onyń aıtýynsha, oqý oshaǵy bilim berýmen ǵana shektelmeı, oqýshylardy zańdy qurmetteıtin, qoǵam aldyndaǵy jaýapkershilikti sezinetin belsendi azamat etip tárbıeleýge basymdyq berip keledi.
«Atalǵan klýbtyń negizgi maqsaty – oqýshylardyń quqyqtyq saýattylyǵyn arttyrý, tártipke baýlý jáne kásibı baǵdar berý. Osy ıgi bastamany júzege asyrý maqsatynda Astana qalasy Saraıshyq aýdanynyń aýdandyq prokýratýrasy qaladaǵy 17 mektepten eń úzdik 17 oqýshyny iriktep, klýb músheligine qabyldap, saltanatty túrde sertıfıkattarmen marapattaǵan edi. Búgin, mine, osy bastamanyń jalǵasy retinde mektebimizdiń oqýshylaryn О́tegen Seıitov atyndaǵy «Jas prokýrorlar» klýbynyń qataryna qabyldaý rásimin ótkizip otyrmyz. Ulttyq quryltaıda Memleket basshysy Qasym-Jomart Toqaev balalardyń quqyqtyq saýattylyǵyn arttyrýǵa, olardyń ómir qaýipsizdigin qamtamasyz etýge qatysty naqty tapsyrmalar bergeni belgili. Búgin ashylyp otyrǵan mektepishilik klýb osy mańyzdy bastamalardy óz josparyna engizip, júıeli ári nátıjeli jumys atqarady dep senemiz», dedi mektep dırektory.
Is-shara barysynda sóz alǵan Saraıshyq aýdany prokýrorynyń orynbasary Baýyrjan Asqarov bul bastamanyń tárbıelik mánine toqtaldy.
«Atalǵan joba mekteptiń tek sapaly bilim berýmen ǵana shektelmeı, zańǵa qurmetpen qaraýdy qalyptastyrýǵa, jastardy jaýapty ári belsendi azamat retinde tárbıeleýge aıryqsha mán beretinin aıqyn kórsetedi. Mundaı ıgi ister arqyly bolashaqta el múddesin qorǵaıtyn, ádildikke qyzmet etetin sanaly urpaq qalyptasatynyna senim mol. Uıymdastyrýshylarǵa tabys al oqýshylarǵa bıik maqsat, aıqyn baǵdar jáne jarqyn bolashaq tileımin», dedi ol.
Is-sharaǵa arnaıy qatysqan Astana qalasynyń Bala quqyqtary jónindegi ýákili Ásıma Bımendına da bastamanyń mańyzyn erekshe atap ótti.
«Zań men tártip – búgingi qoǵam úshin eń ózekti taqyryptardyń biri. Prokýratýra qyzmetkerleriniń balalarmen tikeleı kezdesip, olardyń suraqtaryna jaýap berýi, ashyq dıalog ornatýy jasóspirimderdiń quqyqtyq sanasyn qalyptastyrýǵa, bolashaq ómirine durys baǵyt berýge úlken yqpal etedi dep senemin. Keıingi eki-úsh jylda prokýratýra organdarymen birlesip, balalardyń qaýipsizdigine baǵyttalǵan kóptegen joba júzege asyryldy. Bul jumystardyń barlyǵy jas urpaqtyń bolashaǵyn qorǵaýǵa arnalǵan», dedi ýákil.
Al О́tegen Seıitov atyndaǵy «Bolashaq prokýrorlar klýbynyń» jetekshisi Janseri Senǵazy klýbtyń jumys baǵyttaryna toqtaldy. Onyń aıtýynsha, joba Bas prokýratýranyń bastamasymen qolǵa alynyp, Astana qalasynyń Saraıshyq aýdany prokýratýrasy arqyly júzege asyrylyp keledi. Qazirgi tańda bastama 17 mektepti qamtyp otyr.
«Bul klýb zań men tártip qundylyqtaryn jas urpaqtyń sanasyna sińirýge baǵyttalǵan mańyzdy orta. Aldaǵy ýaqytta quqyqtyq kezdesýler, tanymdyq sabaqtar, tájirıbelik jumystar men tárbıelik is-sharalar júıeli túrde ótkizilmek. Biz alǵan bilimimizdi el ıgiligine jumsaıtyn, ádildikke qyzmet etetin adal azamat bolýǵa umtylamyz», dedi klýb jetekshisi.
