Aýrýhananyń bas dárigeri Dınara Jumadilovanyń aıtýynsha, sheberlik saǵatynyń negizgi maqsaty – dárigerler arasynda ózara tájirıbe almasý. Sonymen qatar emdeý mekemesin bolashaqta zamanaýı tehnologııalarmen jabdyqtaý josparlanǵan. Bul júrek aqaýy bar balalarǵa osyndaı kúrdeli operasııalardy kedergisiz jasaýǵa múmkindik beredi. Tájirıbe almasý barysynda kardıohırýrgter jasandy qan aınalymy jaǵdaıynda qarynshaaralyq perde aqaýyn plastıkalaý, ashyq arterııalyq ózekti baılaý, ashyq sopaqsha tesikti tigý, trıkýspıdaldi qaqpashany qalpyna keltirý sekildi kúrdeli prosedýralardy júzege asyrdy. Sheteldik qonaqtar – Belarýs Respýblıkalyq balalar hırýrgııasy ǵylymı-praktıkalyq ortalyǵynyń jetekshi mamandary.
«Operasııa jasaý arqyly biz balany qalypty ómirge qaıtaramyz. Qazir medısınanyń damyǵan kezi. Eger qursaqtaǵy sábıdiń asqazan nemese ishek joldarynan aqaý anyqtalsa, ol ómirge kelmeı jatyp ta operasııa jasala beredi. Biraq mundaı operasııalar kóbine Astana, Almaty qalalarynda júrgiziletin. Búginde qalalyq densaýlyq saqtaý basqarmasynyń qoldaýymen Shymkenttiń perınataldyq ortalyǵynda da osyndaı kúrdeli emsharalar qolǵa alynyp jatyr», dedi D.Jumadilova.
Bas dárigerdiń sózine súıensek, qalalyq klınıkalyq balalar aýrýhanasy janynan byltyr aqpanda ashylǵan kardıohırýrgııa bólimshesinde osy ýaqytqa deıin 16 balanyń júregine ashyq operasııa jasalǵan. Buryn mundaı naýqastar respýblıkalyq ortalyqtarǵa nemese Túrkistan oblystyq aýrýhanasyna joldanatyn. Al jeńil túrlerine angıograf apparaty arqyly san tamyrynan operasııa jasalady.
Mamandardyń pikirinshe, keıingi jyldary júrek aqaýymen týatyn sábıler sany azaıyp keledi. Bul – júkti áıelderdiń ýaqtyly skrınıngten ótýi men aldyn alý sharalarynyń nátıjesi. Degenmen qany azdyq, joǵary qan qysymy, júktilik kezindegi vırýstyq ınfeksııalar áli de qaýip faktory bolyp qala beredi.
Aıta keteıik, ıgi iske «BI Group» qurylys holdıngi muryndyq boldy. Sheteldik mamandardy shaqyrý, olardyń jatyn orny men qalamaqysyn tóleý sekildi shyǵyndardy kompanııa tolyqtaı óz moınyna alǵan. Holdıngke qarasty «BI Juldyzaı» qorynyń medısına jónindegi dırektory, «Múmkindik» jobasynyń jetekshisi Uljalǵas Muhambetovanyń aıtýynsha, 2013 jyly bastaý alǵan bul qaıyrymdylyq jobasy qazir elimizdiń 9 qalasynda jumys isteıdi. Jobanyń basty mindeti – naýqas balalarǵa qymbat operasııalardy tegin jasatý, otandyq dárigerlerdiń biliktiligin arttyrý. Máselen, byltyr kompanııanyń 30 jyldyǵyna oraı josparlanǵan 300 operasııanyń ornyna 325 kúrdeli operasııa jasalyp, meje asyra oryndalǵan. Osy maqsatta Túrkııa, Japonııa, Reseı, ózge de elderden bilikti mamandar shaqyrtylǵan.
Belarýstik anestezıolog-reanımatolog Alekseı Sılko byltyr aqpan aıynda Shymkentte bolǵanyn eske aldy. Onyń baǵalaýynsha, bir jyl ishinde jergilikti kardıohırýrgııa bólimshesiniń jabdyqtalýy men mamandardyń kásibı deńgeıi edáýir ósken.
«Jalpy, statıstıka boıynsha, ómirge keletin sábılerdiń shamamen 1,5%-y júrek aqaýymen týady. Bul kórsetkish demografııalyq ósimge baılanysty ózgerýi múmkin. Aqaýdyń naqty sebebi belgisiz bolǵanymen, ekologııa, durys tamaqtanbaý, kúızelis negizgi faktorlar retinde qarastyrylady. Biz ótkizgen úsh operasııanyń ekeýin jergilikti hırýrgterdiń ózderi jasady, bul olardyń tájirıbesi men sheberligi artqanyn kórsetedi», dedi A.Sılko.
Belarýs mamandary úsh kúnge sozylǵan sapar barysynda barlyǵy 6 balaǵa kúrdeli operasııa jasady.
ShYMKENT
